Almatydaǵy "Buqar jyraý" turǵynúı kesheninde atys shyǵarǵan kúdikti 17 qabattan sekirip qaza tapty. Tómende túrli baspasóz betteri men telegram resýrstarda jarıalanǵan aqparattar negizinde oqıǵa hronologıasy usynylǵan.

17:15. "Buqar jyraý" kesheni turǵyndarynyń biri qarýlanyp, atys shyǵarǵany týraly aqparat tarady. Artynsha ol kúzetshisini pyshaqpen jaralaǵany habarlandy. Almaty polısıasy aýmaqty qorshaýǵa alyp, turǵyndardy páterinen shyqpaýǵa shaqyrdy. Polısıa kúdiktimen birneshe márte kelissóz júrgizýge tyrysty. Biraq odan eshteńe shyqpady. Osy ýaqytta ǵımaratqa basyp kirýge daıarlyq júrip jatty.

17:57. Kúdikti 22 qabatty úıdiń 16 qabatynda turatyn 60 jasqa kelip qalǵan er adam ekenin týraly aqparat shyqty. Birneshe qabat turǵyndary shuǵyl evakýasıalandy.

18:25. Turǵynúı kesheninen atys daýystary estilgeni habarlandy. 

19:04. Turǵynúı kesheni aýmaǵynda ınternet buǵattaldy. Osy ýaqytta atys shyǵarǵan er adam kórshilerine únemi birtúrli kórinetini týraly aqparat tarady.

19:19. Aldymen 3, odan keıin 5 oq atylǵany estildi. Kúdikti 50-60 jas aralyǵyndaǵy er adam, kórshilerimen udaıy janjaldasyp júretini jarıalandy.

19:30. Jıyrma shaqty oq daýsy estildi.

19:55. Taǵy 7 ret oq atylǵany habarlandy.

20:04. Polısıa kúdiktimen dıalogqa kelmek bolǵanymen, ol sóılesýge qulyq tanyspady. Osy aralyqta kúdiktini ustaý boıynsha arnaıy operasıa júrgizilip jatty.

20:51. TK aýmaǵyna áskerı jıp, qutqarýshylar, qosymsha polısıa men jedel járdem kóligi keldi.

21:11. Terezeniń shaǵylǵany, atys daýystary estildi.

21:13. Kúdikti terezeden sekirip ketkeni týraly aqparat tarady. Keı resýrstar kúdikti sekirerde "allahý akbar" dep aıqaılaǵanyn habarlady.

21:49. Kúdiktiniń kórshileri osydan eki apta búryn atys daýsyn estigenin, bul týraly PIK ókilderine eskertkenin málim etti.

22:00. Polıseı jaralanǵany týraly aqparat tarady.

22:09. Kúdiktiniń psıhıkasy turaqsyz bolǵany, din týraly birtúrli áńgimeler aıtqany, áıeli bala-shaǵysyn alyp, ketip qalǵany týraly aqparat shyqty.

22:16. Almaty polısıa departamenti kúdikti ólimin rastady.

22:21. PD polıseı zardap shekpegenin málim etti.

22:26. Oqıǵa ornynan shuǵyl brıfıń uıymdastyrylyp, Almaty qalasy polısıa departamenti baspasóz qyzmetiniń ókili Saltanat Ázirbek kúdiktiniń "allahý akbar" dep aıqaılaǵanyn joqqa shaǵyrdy. Kúdikti basyp kirý júzege asqanǵa deıin sekirip ketkeni, 1963 jylǵy azamat ekenin belgili boldy. Jalpy jıyntyǵy 30-ǵa jýyq oq atylǵan.

22:28. Qalalyq densaýlyq saqtaý basqarmasy 1 ishki kúzet qyzmetkeri, 2 "spesnaz" jaralanǵanyn habarlady.

22:38. Qalalyq densaýlyq saqtaý basqarmasy  buǵan deıin taratqan aqparatty teristep, tek 1 ishki kúzet qyzmetkeri jaralanǵanyn jarıalady.