Qazaqstannyń Túrkıadaǵy qurmetti konsýly, kásipker Halıl Ýlýer jol apatynan kóz jumdy. Qaraly habardy Qazaqstannyń Túrkıadaǵy tótenshe jáne ókiletti elshisi Abzal Saparbekuly áleýmettik jelidegi paraqshasynda habarlady.

– Qazaqstannyń Túrkıadaǵy Elshiligi úshin óte aýyr sýyt habarmen bóliskeli otyrmyn. Elimizdiń Túrkıanyń Nevshehır provınsıasynda 2009 jyldan beri qurmetti konsýlymyz bolyp kele jatqan tamasha, aqkóńil azamat, adal dos, túriktiń belgili isker adamy Halıl Ýlýer myrzanyń jáne asyl jarynyń búgin keshki ýaqytta jol apatynan qaza tapqanyn tereń kúızelis qaıǵymen bildim, – dedi A. Saparbekuly.

Elshiniń aıtýynsha, Halıl Ýlýer tek óz eliniń emes, qazaq halqynyń naǵyz janashyr dosy bolǵan, qazaq-túrik baýyrlastyǵy men yntymaqtastyǵy úshin eleýli úles qosqan.

– Qazaqstannyń kók týyn túrik jurtynda árdaıym jelbiretip, Qazaqstan úshin maqtan tutatyn birtýar asyl azamat edi. Pandemıa kezinde osyndaǵy stýdentterge qol úshin aıamaı kómektesip, Qazaqstanǵa gýmanıtarlyq kómek joldap, qol ushyn bergenderdiń qamqorshylardyń aldyńǵy shebinde edi. Elimizge ınvestısıa tartý úshin kúndiz-túni birge kezdesýler ótkizip, kelissózder júrgizip júr edi, – dep jazdy elshi áleýmettik jelidegi paraqshasynda .