Nesıesin japqan 1,5 mln qazaqstandyqtyń nesıe tarıhy buzylǵan. Bul týraly senattyń jalpy otyrysynda qarjy naryǵyn retteý jáne damytý agenttigi tóraǵasynyń orynbasary Nurlan Abdrahmanov málimdedi. 

Onyń aıýtynsha, agenttik ekonomıkalyq taldaý júrgizgen. Qazirgi ýaqytta elde eki kredıttik búro bar. Olarda 6,7 mln-ǵa jýyq qaryz alýshynyń aqparaty jınaqtalǵan. Bul málimetterde qazirgi nesıeler men ótelgen qaryzdar, sondaı-aq tóleý merzimi ótip ketken nesıeler bar.

– Osynyń arasynda 1,5 mln adam nesıesin japqanymen, olardyń nashar nesıe tarıhy saqtalyp otyr. Óıtkeni bul adamdar tóleý merzimin 90 kúnnen asyryp alǵan. Buǵan baılanysty bankter men mıkroqarjylyq uıymdar olarǵa jańa qaryzdy berýden bas tartady. Atalǵan 1,5 mln adamnyń arasynda 489 myń adam bes jyldan astam ýaqyt buryn tóleý merzimi ótip ketken qaryzdaryn japqan, – dedi Nurlan Abdrahman.

Nesıe tarıhyn saqtaý merzimi 10 jyldan 5 jylǵa deıin qysqarǵanda, kóp azamattardyń nesıe tarıhy týraly aqparat ózgeredi.