Qazaq KSR-niń halyq artisi, ánshi, kompozıtor Eskendir Hasanǵalıev koronavırýstan qaıtys boldy. Bul týraly sport jáne mádenıet vıse-mınıstri Nurqısa Daýeshov facebook paraqshasynda habarlady.

– Ardaqty aǵamyz, asyl aǵamyz, áıgili kompozıtor, QR Memlekettik syılyǵynyń ıegeri, Qazaqstan KSR halyq artısi Eskendir Ótegenuly Hasanǵalıev ómirden ozypty.

Marqumnyń jaqyndaryna qaıǵyryp kóńil aıtamyn. Imany salamat bolsyn.. – dep jazdy vıse-mınıstr.

Eskendir Hasanǵalıev 1940 jyly 13 aqpanda Batys Qazaqstan oblysy Qaratóbe aýdany Qaldyǵaıty okrýgi Batpaqkól mekeninde dúnıege kelgen.

Qurmanǵazy atyndaǵy Almaty memlekettik konservatorıasynyń vokaldy-horlyq fakúltetin E. Vınogradov pen N. Sharıpovanyń klasy boıynsha kýrsty bitirgen.

Ál-Farabı atyndaǵy Shymkent mádenıet ınstıtýtyn támamdaǵan.

1970 jyldan bastap, Qazaq radıosy men teledıdarynyń solısi bolǵan.

E.Hasanǵalıevtiń oryndaý máneri joǵarǵy kásibı deńgeımen erekshelenetin. Ol Qazaqstannyń belgili estradalyq ánshileri oryndaıtyn kópshilikke jaqsy tanymal ánderdiń avtory bolǵan.

Hasanǵalıevtiń "Ádemi", "Asyl arman", "Ómirimniń jazy", "Atameken" ánderin tek Qazaqstan tyńdarmandary emes, shetelderde de yqylaspen qabyldaıdy.