Prezıdent Qasym-Jomart Toqaev Qazaq KSR-niń halyq ártisi, ánshi, kompozıtor Eskendir Hasanǵalıevtiń dúnıeden ótýine baılanysty onyń otbasy men jaqyndaryna kóńil aıtý jedelhatyn joldady.

Jedelhatty Aqordanyń resmı saıty jarıalady.

"Eskendir Ótegenulyn halqymyz qońyr daýysty ánshi jáne jan tebirenterlik ánder shyǵarǵan kompozıtor retinde óte jaqsy kórgen edi. Uzaq jylǵy shyǵarmashylyq jolynda jemisti eńbek etip, otandyq mýzyka óneriniń damýyna zor úles qosty.

Halqymyzǵa 200-ge jýyq án, romans jáne horǵa arnalǵan shyǵarmalaryn tartý etti. Ásirese, "Atameken", "Anaǵa sálem", "Esińe al", "Aınalaıyn", "Ádemi-aý", "Gúlsezim" jáne basqa da tamasha týyndylary kórermen tarapynan joǵary baǵasyn aldy.

Halqymyzdyń súıispenshiligi men aıryqsha qurmetine bólendi. Elimizdiń óneri men mádenıetin órkendetýge atsalysyp, sońyna jarqyn iz qaldyrǵan Eskendir Ótegenulynyń beınesi umytylmaıdy, esimi halqymyzdyń jadynda saqtalady", delingen jedelhatta.

Qazaqstannyń halyq ártisi Eskendir Hasanǵalıev 30 sáýirde 81 jasynda dúnıeden ótti.

Buǵan deıin Eskendir Hasanǵalıev pen jubaıy Darıko Hasanǵalıevanyń koronavırýs juqtyryp, jansaqtaý bóliminde jatqany habarlanǵan.