Syrtqy ister mınıstri Muhtar Tileýberdi májilistegi "Nur Otan" partıasy fraksıa músheleriniń Ońtústik Koreıadaǵy qazaqstandyqtardyń zańdy eńbek etý múmkindigin pysyqtaý máselesine baılanysty saýalyna jaýap berdi.

Mınıstr jaýabynda 2020 jylǵy 31 jeltoqsandaǵy jaǵdaı boıynsha Ońtústik Koreıa aýmaǵynda 8902 qazaqstandyq zańsyz eńbek mıgranttary retinde júrgeni aıtylady.

Onyń aıtýynsha, Koreıa Respýblıkasynyń sheteldik eńbek kúshterin maýsymdyq jumysqa tartý baǵdarlamasyna (The Seasonal Worker) sáıkes, Qazaqstan azamattaryn Ońtústik Koreıanyń aýyl jáne balyq sharýashylyǵy salasyna maýsymdyq jumystarǵa tartý jónindegi usynysty osy eldiń tıisti mekemeleri men jergilikti provınsıalarynyń ákimshiligi iske asyrýǵa qyzyǵýshylyq tanytpaǵan. Buǵan "Covid-2019" indetiniń órshýine baılanysty engizilgen karantın shekteýleri men qazaqstandyqtardyń kásiptik ıkemdiligi atalǵan baǵdarlamaǵa engizilgen salalarǵa (teńiz balyq sharýashylyǵy, kúrish óndirý salasy jáne t.b.) saı kelmeýi sebep bolǵan.

– 2020 jylǵy 25-26 qarasha aralyǵynda Seýl qalasynda "Ortalyq Azıa – Koreıa Respýblıkasy" yntymaqtastyq forýmynyń 13-shi otyrysy aıasynda Ońtústik Koreıa Syrtqy ister mınıstrimen bolǵan kelissózder barysynda koreıalyq Employment Permit System – EPS ("Eńbek ruqsattary júıesi" - ERJ) sheteldikterdi jumysqa ornalastyrý júıesine qosylý máselesin kóterdim jáne koreı tarapy oǵan jalpy qarsylyq bildirmedi. Atalǵan ERJ-ge qosylý úshin Koreıanyń jaýapty memlekettik mekemeleri QR tıisti memlekettik organymen jumys kúshin jaldaý týraly negizdemelik kelisim jasaýǵa tıis. Koreıalyq taraptyń negizgi talaby – Qazaqstan Ońtústik Koreıaǵa eńbek mıgranttaryn jiberýmen aınalysatyn arnaıy memlekettik mekeme qurýy qajet, – dedi ol.

Qazirgi tańda jol kartasy ázirlenip jatyr, oǵan saı Eńbekmın janynan Kóshi-qon komıteti qurylmaq. Alaıda bul qazaqstandyq eńbek mıgranttarynyń máselesin túbegeıli sheshpeıdi, óıtkeni, júıege qosylǵan jaǵdaıda azamattardyń bir bóligi ǵana eńbek kelisimi boıynsha resmı túrde jumys isteıtin bolady. Qazirgi ýaqytta osyndaı kelisimder Koreıa Respýblıkasymen 16 el arasynda jasalǵan. Júıe boıynsha jyl saıynǵy bólinetin jalpy kvota 50 myń oryn bolsa, ár elge bólinetin oryn sany 3 myń shamasynda ekeni kórsetilgen.

Sondaı-aq Koreıada el kirýge elektrondyq ruqsat berýdi kózdeıtin pılottyq joba iske qosylmaq. Oǵan sáıkes, týrıser aldyn ala "IOS" jáne "Google Play" mobıldik qurylǵylaryna arnalǵan qosymshalar nemese veb-saıt arqyly jeke jáne jumys saparyna qatysty aqparatty usynady. Al bul óz kezeginde eńbek mıgranttary aǵynyn azaıpaq.