Bizdiń áskerimiz jáne barlyq kúshtik qurylymdar syrttan kelgen qaýip-qaterge toıtarys berýge árdaıym saqadaı-saı daıyn bolýǵa tıis. Bul týraly prezıdent Qasym-Jomart Toqaev memlekettik nagradalar tapsyrý rásiminde málimdedi.

– Barshańyzdy Otan qorǵaýshy kúnimen jáne Jeńis meıramymen quttyqtaımyn! Halqymyzdyń erlik dástúrin tanytatyn qos merekeni bıyl táýelsizdigimizdiń 30 jyldyǵy aıasynda atap ótemiz.  

Egemendiktiń qadir-qasıeti – jerdiń tutastyǵy men eldiń tynyshtyǵynda. Osy asyl qundylyqtardy qarýly kúshterimiz qas qaqpaı kúzetip tur. 

Táýelsizdik jyldarynda tuńǵysh prezıdentimiz, elbasy Nursultan Ábishuly Nazarbaevtyń arqasynda memleketimizdiń myqty qorǵanys júıesin qalyptastyrdyq. Áskerimizdiń bes qarýyn saıladyq. Sarbazdarymyzdyń jaýyngerlik rýhyn kóterip, kásibı mashyǵyn shyńdadyq. Búginde armıamyz – eldigimizdiń berik qalqany, táýelsizdigimizdiń myzǵymas tuǵyry, – dedi Toqaev.

Onyń aıtýynsha, ulttyq qorǵanys isinde temirdeı tártip saqtaýlýy kerek.

– Qazaqstan – beıbitshilik pen turaqtylyqty qalaıtyn memleket. Biraq ulttyq múddege nuqsan keltiretin kez-kelgen áreketke toıtarys bere alamyz. Sońǵy ýaqytta  jer júzinde túrli qaqtyǵystar kóbeıip ketti.

Sarapshylar alpaýyt memleketter arasyndaǵy tartystardy qyrǵı-qabaq soǵys kezeńindegi ahýalmen teńestirýde. TMD aýmaǵynda, tipti, irgeles kórshi elderde janjaldar paıda bolyp jatyr. Eski daýlarǵa qazirgi túıtkilder qosylyp, jaǵdaı kúrdelene tústi. Bul – bárimizdi alańdatyp otyrǵan másele. Sondyqtan arqany keńge salmaı, ulttyq qorǵanys isinde temirdeı tártip saqtaýymyz kerek.  Bizdiń áskerimiz jáne barlyq kúshtik qurylymdar syrttan kelgen qaýip-qaterge toıtarys berýge árdaıym saqadaı-saı daıyn bolýǵa tıis, – dedi prezıdent.