Tatarstan astanasy Qazan qalasyndaǵy mektepte bolǵan atystan jaraqat alǵan balalardyń jaǵdaıy qazir turaqty. Bul týraly respýblıka prezıdentiniń baspasóz qyzmeti hatshysy Lılıa Galımova habarlady.

Taratylǵan aqparatqa saı, Qazandaǵy №175 mektepte oq atý kezinde zardap shekken jáne Tatarstannyń Respýblıkalyq balalar klınıkalyq aýrýhanasynda emdelip jatqan 14 balanyń jaǵdaıy turaqty, olardyń ómirine qaýip tónip turǵan joq. 

Eldiń densaýlyq saqtaý mınıstrligi sársenbide 5 bala men 3 eresek adam Máskeýdegi federaldyq klınıkalarǵa qajetti em alý úshin jetkizilgenin habarlady. Jeńil dárejedegi bas mıy shaıqalyp, beti syrylǵan 1 bala turǵylyqty jeri boıynsha dárigerlerdiń qadaǵalaýymen aýrýhanadan shyǵarylǵan. Al 14 bala Tatarstannyń respýblıkalyq balalar klınıkalyq aýrýhanasynda em qabyldaýda.

Eske sala keteıik, Qazandaǵy Djaýdata Faızı kóshesindegi mektep 19 jastaǵy jasóspirim Ilnaz Galávıev qarýmen shabýyl jasap, mekteptiń  kireberisinde qoldan jasalǵan jarylǵysh zatty iske qosqan. Sonyń saldarynan eki muǵalim, jeti oqýshy qaza taýyp, 21 adam jaraqat alǵan.

Ilnaz Galávıev sotta óz kinásin tolyǵymen moıyndady. Ol Qylmystyq kodekstiń 105-baby "adam óltirý" faktisi boıynsha aıyptalýda. Tergeý jalǵasyp jatyr.