Aqtóbe oblysy boıynsha sybaılas jemqorlyqqa qarsy departamenttiń qyzmetkeri fırma ıesinen 60 mln teńge para alǵany úshin sottaldy.

Sot málimetine saı, 2019 jyldyń 5 shildesinde oblystyń Sybaılas jemqorlyqqa qarsy qyzmet aǵa-ofıseri jeke kompanıa ıesin eseptelgen salyqtar men ósimpuldardy azaıtý máselesin retteý úshin para berýge ıtermelep, onyń 60 mln teńge somasyndaǵy aqshalaı qarajatyn ıemdengen dep aıyptaldy.

Aqtóbe oblysy qylmystyq ister jónindegi mamandandyrylǵan aýdanaralyq soty aǵa-ofıserdi 12 jylǵa bas bostandyǵynan aıyrdy. Ol jazasyn qaýipsizdigi joǵary qylmystyq-atqarý júıesi mekemesinde óteıdi. 

Onyń kinási jábirlenýshiniń, kýágerlerdiń málimdemesi, tergeý, jedel-izdestirý is-sharasy hattamalary, sot saraptamasy qorytyndysy arqyly rastalǵan.

Sonymen qatar, sottalýshy ómir boıy memlekettik qyzmette jumys isteý quqyǵynan aıyryldy.