«Nur Otan» tóraǵasynyń birinshi orynbasary Baýyrjan Baıbek Facebook-tegi paraqshasynda partıanyń óńirlerdegi «qaıta jańǵyrýy» jáne Nursultan Nazarbaevtyń aldaǵy elektorataralyq kezeńge qoıǵan mindetteri týraly aıtty.

Onyń aıtýynsha, «Nur Otan» májilis pen barlyq deńgeıdegi máslıhattar saılaýynda jeńiske jetken alǵashqy kúnnen bastap saılaýaldy ýádelerin oryndaýǵa kirisken.

Osylaısha, árbir oblys, qala jáne aýdan boıynsha 217 egjeı-tegjeıli jol kartasy bekitilgen. Olardyń oryndalýyn júıeli baqylaý úshin 14 respýblıkalyq jáne 1738 óńirlik qoǵamdyq keńes quryldy. Oǵan depýtattardan basqa belgili qoǵam qaıratkerleri, sarapshylar jáne jýrnalıser kirdi.

Partıa lıderi Nursultan Nazarbaev qoıǵan mindetterge sáıkes elektorataralyq kezeńde Ortalyq apparattyń qurylymy ońtaılandyrylyp, elimiz boıynsha partıanyń qoǵamdyq qabyldaý bólmeleri men fılıaldary halyqpen ózara is-áreket jasaýdyń proaktıvti formatyna kóshti.

– Elbasy aıtqandaı, «Nur Otan» «bir orynda turyp qalmaı», árdaıym jetilip otyrýy kerek. Partıa belsendi azamattyq ustanymy, kreatıvti ıdeıalary men jobalary bar adamdardy biriktirip, qoldaýy tıis. Sondyqtan da saılaý barysyndaǵy respýblıkalyq partıaishilik praımerız «Nur Otan» partıasyn júıeli túrde qaıta jandandyrýdyń negizgi elementi boldy.

Búginde, elektorataralyq kezeńde partıanyń kadrlyq áleýetin kúsheıtý boıynsha jumystar belsendi túrde jalǵasýda. Ótken aptada oblystar, qalalar men aýdandardyń barlyq ókildi partıa organdaryna saılaýy aıaqtaldy. «Nur Otan» saıası keńesteriniń quramy óńirlerde 51%-ke jańartyldy, – dedi Baýyrjan Baıbek.

Ol keltirgen aqparattarǵa súıensek, áıelderdiń úles sany 29-dan 35%-ke, 35 jasqa deıingi jastar – 11-den 22,5%-ke deıin ósken. Memlekettik qyzmetshilerdiń úlesi 2 esege, ıaǵnı 18-den 9%-ke deıin tómendedi. Úshten birinen astamy – úkimettik emes uıymdardyń ókilderi, jýrnalıser, blogerler, kásipkerler, sondaı-aq aýyl sharýashylyǵy men ónerkásip qyzmetkerleri. Árbir ekinshi adam – ótken praımerızdiń qatysýshysy.

Baýyrjan Baıbek atap ótkendeı, «Nur Otan»-nyń búkil bastaýysh partıa uıymdarynyń basshylaryn (barlyǵy 4517) saılaý partıamyzdy jańartýdaǵy taǵy bir eleýli qadam boldy. Daýys berý qorytyndysy boıynsha 566 myńnan astam partıalyq, ıaǵnı «bastaýysh partıa uıymdary» basshylarynyń 20%-i jańardy, al 80%-i senim mandatyn qaıta rastady.

– Nur Otan»-nyń mindeti – tıimdi partıalyq-saıası kún tártibin qalyptastyrý jáne jergilikti jerlerde partıalyqtardyń jumysyn túbegeıli túrde kúsheıtý. Búgingi kúni barsha nurotandyqtardy el prezıdenti Qasym-Jomart Toqaevtyń «Halyq únine qulaq asatyn memleket» tujyrymdamasyn tıimdi iske asyrýǵa jumyldyrý mańyzdy. Atap aıtqanda: ózekti máselelerdi ashyq talqylaý, halyqpen «keri baılanysty» kúsheıtý, azamattyq bastamalardy qoldaý, sondaı-aq búdjet qarajatyn jumsaýdyń tıimdiligi men ashyqtyǵyna júıeli monıtorıń júrgizý jáne basqa da máselelerdi qamtıdy. Elbasy aıtqandaı, nurotandyqtardyń basty úsh qaǵıdaty – jaýapkershilik, komandalyq rýh, partıa ıdealdary men qundylyqtaryna beriktik. Biz mejelengen josparlar men bergen saılaýaldy ýádelerimizdiń barlyǵyn judyryqtaı jumyla otyryp, birge júzege asyratynymyzǵa senimdimin, – dep túıindedi ol.