Búgin NurOtan partıasy tóraǵasynyń orynbasary Baýyrjan Baıbektiń belsendi Janbolat Mamaı men I.Imanbaevaǵa qatysty bergen talap aryzyna sáıkes azamattyq is boıynsha onlaın sot prosesi ótti.

Saıasattanýshy Baýyrjan Serikbaev J. Mamaıdyń qolynda ilip alar naqty derek joq ekenin aıtady.

– Sot júrip jatyr. Árıne, munda qurǵaq sóz ben emosıaǵa oryn joq. Bári de dáleldi, tıanaqty, aıǵaqty bolýy tıis. Sonymen, eki taraptyń da óz sózin dáleldeıtin naqty faktilerdi usynýy talap etildi. Baıbek Mamaıdyń ózine taqqan aıyptaýlaryn teriske shyǵaratyn naqty qujattardy usyndy. Endi sot "Mamaıǵa da aıtqan sózderińdi dáıekteıtin naqty faktiler men dálelderińdi ortaǵa sal" degen talap qoıdy. Mine, qyzyq osy jerde bastaldy. Mamaı muny kútpese kerek. Qolynda ilip alar naqty derek, taqqan aıyptaýlaryn negizdeıtin anyq faktiler joq. "Debatqa túsem" dep bir, máseleni saıasılandyrmaq bolyp eki tyrysyp, ary-beri tartyp kórip edi, munysynan túk shyqpady. "Sýǵa ketken tal qarmaıdy" degendeı, endigi bar tapqany "Sot nege qazaq tilinde emes, orys tilinde júredi?" dep shyǵa keldi, – dep jazdy ol.

Serikbaev Baıbektiń qazaqshasyna kúmán keltirgenderdiń pikirine de aıtary baryn jetkizdi.

– Bálkim, Baıbek aqyn Muhtar Nıazovtaı tógildirip, óleńdetip sóıleı almaıtyn shyǵar. Biraq eshkim de Baıbekti jumysqa qajetti deńgeıde qazaq tilin jetik bilip, jatyq sóıleı almaıdy dep syn taǵa almaıdy. Bir qazaqtaı qazaq tilin meńgergen. Bul rette Mamaıdyń joq jerden ilik izdep, tilge jabysýy múldem qısynsyz. Onyń qazaq tilin alǵa tartyp, janashyr bola qalýy arzan upaı jınaý, – dedi saıasattanýshy.

Budan bólek ol Baýyrjan Baıbek Almaty ákimi bolyp turǵanda qazaq tili men ulttyq muraǵa qatysty kóptegen jumys atqarǵanyn aıtyp, solardyń birqataryn toqtalady.

Ol "Bolashaq" qorynyń qoldaýymen sheteldik 40 shaqty úzdik múltfılmdi qazaq tiline dýblájdaýdy, Almatyda "Alataý" dástúrli óner teatrynyń ashylýyn, 400-deı kósheniń, yqshamaýdandardyń ataýyn qazaqshaǵa aýystyrǵanyn, jerasty ótkelderin jóndep, ony oıý-órnekpen áspettep, qazaq kúılerin kúmbirletip qoıǵanyn, aıtys pen ulttyq sport túrlerin damytýǵa "Nur Otan" partıasynyń qoldaý kórsetip jatqanyn tizbekteıdi.

Al qoǵam belsendisi Janbolat Mamaı  búgingi sot prosesinen keıin áleýmettik jelidegi paraqshasynda jazba jarıalap, "sot Baıbektiń jaǵynda ekeni anyq" dep málimdedi. 

– Bara-bara Baıbektiń soty bizdi qatystyrmaı-aq sottap jibere me dep otyrmyn. Jańa ǵana bizdiń qorǵaýshymyzǵa Áýezov aýdandyq soty Sartaeva R. habarlasyp, saraptama ótkizý týraly sheshim qabyldaǵanyn jetkizgen.

Negizi, bul jerde jaýapker biz emespiz be? Nege bizdi qatystyrmaıdy sotqa? Sheshimdi nege biz tyńdamaımyz? Sot Baıbektiń jaǵynda ekeni anyq qazirdiń ózinde. Onyń sheshimi: Sot saraptamasyn taǵaıyndaý jáne bizdiń aryzymyz belgili maman Qarymsaqovany qatystyrýdan bas tartty, – dedi Mamaı.

Ol óz sózinde "sot prosesine 10-ǵa jýyq jýrnalıs qatysa almady, is júzinde ashyq sot prosesi jabyq túrde júrip jatyr" dedi. 

Baıbek-Mamaı teketiresi belsendiniń NurOtan partıasy tóraǵasynyń orynbasary týraly vıdeomaterıal jarıalaýynan bastalǵan. Janbolat Mamaı ol jerde UZUN Qulaq telegram kanalyndaǵy, ashyq derekkózderdegi, birqatar baspasóz betterinde jarıalanǵan aqparattardy negizge alyp, Baıbekti "búdjet aqshasyn "jep" mıllıarder atandy" dep aıyptaıdy. Buǵan jaýap retinde Baıbek NurOtan partıasynyń eks-depýtaty, búginde youtube jelisinde vıdeoblog túsirýmen aınalysyp júrgen Táńirbergen Berdońǵarǵa suhbat berip, oppozısıonerdiń aıyptaryn teristep, ony sotqa beretinin málim etti. Munan soń Mamaı Qazaqstan soty ózin jyǵyp beretinin málim etip, Baıbekti tikeleı efır rejıminde ashyq debatqa shyǵýǵa shaqyrdy. Uzamaı NurOtan partıasy atynan májilis depýtaty atanǵan Elnur Beısenbaev Qazaqstan arnasynyń jýrnalısi Nartaı Aralbaıulynyń youtube arnasyna suhbat berip, Mamaıdyń Baıbekti debatqa shaqyrýyn synap, Mamaıdyń ózin debatqa shaqyrady. Buǵan jaýap retinde Mamaı debatqa basqa-basqany emes, óziniń sózderin "ótirik" degen, sotqa beretinin aıtqan Baıbekti shaqyrǵanyn málim etedi.