Baýyrjan Baıbektiń ókili Aıjan Tashenova óziniń áleýmettik jelidegi paraqshasynda búgin ótken Baıbek-Mamaı sotynyń barysy týraly jazdy.

"Búgin B. Baıbektiń talap aryzy boıynsha sot prosesine daıyndyq aıasynda ekinshi otyrys ótti.

Osy oraıda birqatar mańyzdy jáıtterge nazar aýdartqym keledi.
Osydan bir aı buryn, ıaǵnı 19 sáýirde Baýyrjan Baıbek óz suhbatynda J. Mamaı men I. Imanbaevanyń eshqandaı negizsiz, biryńǵaı ótirik pen dolbarǵa qurylǵan aıyptaýlaryna naqty ári dáleldi jaýap bergen bolatyn. Sol suhbatynda ol óz ar-namysy men qadir-qasıetin qorǵaý maqsatynda sotqa júginetinin de jarıa túrde málimdedi. B. Baıbektiń osy suhbaty shyn máninde bizdiń sottaǵy quqyqtyq pozısıamyzdyń negizine aınaldy.

Osyǵan baılanysty 26 sáýirde men resmı ókil retinde jaýapkerlerdiń eshqandaı negizsiz taqqan aıyptaýlaryn teriske shyǵaratyn qujattardyń tolyq paketin (ákimdiktiń 20-dan asa resmı qaýlylary, kelisimsharttar men ózge de materıaldar) aldym. Sonymen qatar men qoljetimdi aqparattarǵa da ekspress-taldaý júrgizdim. Nátıjesinde men talap aryzdy ashyq derekkózderden alynǵan talapker talabynyń durystyǵyn múltiksiz rastaıtyn faktilermen tolyqtyrdym.
Iaǵnı men derekterge jasalǵan qarapaıym faktchekıngtiń ózi oponentterdiń jalǵan tujyrymdaryn tolyqtaı joqqa shyǵarady jáne B.Baıbek qyzmet etken kezeńdegi ákimdik sheshimderi tek memleket pen qoǵam múddesi turǵysynan qabyldanǵanyn rastaıdy dep senimdi túrde málimdeı alamyn.

Sondyqtan men B.Baıbekten senimhat alǵan sátten bastap 4 kún ishinde talap aryz daıyndap 30 sáýirde ony táýelsiz psıhologıalyq-fılologıalyq saraptama qorytyndylarymen birge sotqa joldadym.

Eske sala keteıin, Azamattyq is júrgizý kodeksine sáıkes talap qoıýshy, ıaǵnı B.Baıbek óz talaptaryn dáleldeýge mindetti emes, kerisinshe tek jaýapkerler ǵana sotqa óz aıyptaýlaryn rastaıtyn dáleldemeler usynýǵa tıis.

İstiń rezonans týdyratynyn jáne J.Mamaı men I.Imanbaevanyń udaıy faktilerdi burmalaýǵa áreket etetinin eskere otyryp, men barlyq múddeli tulǵalardyń tanysýy úshin talap aryz ben saraptamany sala otyryp, post jarıaladym. Buǵan qosa, jaýapkerlerdiń áleýmettik jelilerdegi destrýktıvti belsendiligin kóre otyryp, men olardy talap aryz bergen kúni arnaıy tegtedim.
Osyǵan qaramastan, birinshi otyrysta jaýapkerler men olardyń advokattary «talap aryz ben saraptamanyń mánin talqylaýǵa daıyn emestigin» málimdep, sottan «is materıaldaryn zerdeleýge», BİR QYZYǴY, «DÁLELDEMELER JINAÝǴA» qosymsha ýaqyt berýdi surady.

Áıtse de jaýapkerlerdiń kóptegen ar-namysqa tıetin, qorqytyp-úrkitetin jáne jalań aıyptaýlar daıyndap, áleýettik jeliler men buqaralyq aqparat quraldarynda ornalastyrýǵa ýaqyty jetkilikti ekenin atap ótken jón.

Halyqaralyq quqyqty zerttegen zańger retinde Jýrnalısiń kásiptik etıkasynyń halyqaralyq qaǵıdattarynyń erejesine sáıkes «BAQ ókilderiniń basty mindeti – obektıvti naqtylyq arqyly adamdardyń rastalǵan jáne shynaıy aqparat alýyna kepildik berý (qaǵıdat – jýrnalısiń obektıvti aqparatqa adaldyǵy) ekenin atap ótkim keledi.

Ózderi aıtyp júrgendeı, jýrnalısıka salasynda 10 jyldan artyq jumys istegen maman, burynǵy bas redaktorlar retinde J.Mamaı men I.Imanbaeva muny jaqsy bilse kerek. Kez kelgen aqparat, onyń ústine jarıalanymǵa ózek etip alynyp otyrǵan salmaqty aıyptaý naqty faktiler men qujattarǵa negizdelip, shynaıy derek kózine siltemesi bolýy tıis.

Áıtse de, jala jabýshy vıdeo jarıalanǵannan keıin ÓTKEN 36 KÚN İSHİNDE «jýrnalısik zertteý» dep atalatyn aıyptaýlaryn rastaıtyn qujattaı dáleldemeler jarıalan joq. Jaýapkerler muny sotqa ǵana emes, tipti óz advokattaryna da usynbaǵan. Bul jaıynda I.Imanbaevanyń advokaty – A.Túsipova birinshi otyrysta málimdedi. Sonymen qatar I.Imanbaeva 17 mamyrda «kz.media» portalyna bergen suhbatynda qujattaı dáleldemeniń bolmaý faktisin, ıaǵnı sottaǵy jeńilisti moıyndady.

Búgingi otyrysta sýdıa jaýapkerlerge sot taǵaıyndaıtyn psıhologıalyq-fılologıalyq saraptama úshin suraqtar tujyrymdaý jaıly birneshe ret ótinish aıtty. Sot isti daıyndaý kezinde toqtata turyp, keshendi táýelsiz sot saraptamasyn taǵaıyndaý týraly uıǵarym shyǵardy.

Jalpy, ózderiniń jalǵan aıyptaýlaryna qandaı da bir dálelder joq ekendigin eskere otyryp sot talqylaýlary barysynda J.Mamaı men I.Imanbaeva talqylaýdy barynsha sotqa qatysy joq máselege buryp áketýge tyrysyp, barlyǵyn arzan qoıylym men saıası farsqa aınaldyrǵysy keledi. Mysaly, basynda jaýapkerler sotqa narazylyq bildirý, qarsy talap aryz berý týraly málimdep, odan ári qaraı qaıtadan B.Baıbektiń tikeleı ózi qatysýyn talap etti, sonymen qatar kóptegen ekinshi kezekti suraqtar kóterdi.

Bul sot prosesi áıgili brıtan jazýshysy Djonatan Svıfttiń myna bir qanatty sózin rastaı túsedi: «Qurttardyń negizinen shyryndy jemisterge úımeleıtini sekildi, ádette abyroıly adamdarǵa jala jabylady».

Sondyqtan da jaýapkerlerdiń prosesti sozýǵa janushyra tyrysýyna qaramastan, sot bul isti máni boıynsha zańda belgilengen merzimde qarap, daýǵa ádil núktesin qoıady dep úmittenemin.

Sizderdi talqylaý barysy týraly ári qaraı da habardar etip otyramyn" delingen jazbada.