Olardyń joǵalǵany týraly habarlama 112 púltine 2021 jylǵy 25 mamyrda saǵat 18:30-da kelip túsken. 21 mamyrda týrıser "Sary-Aıǵyr" shatqalyna jaıaý bet alǵan. Qutqarýshylarǵa habarlasqan adamnyń aıtýynsha, olar 24 mamyrda úıge  oralýy kerek edi.

TJM resmı ókili Talǵat Ýálıdiń aıtýynsha, ótken táýlikte izdestirý toptary 37 shaqyrymǵa jýyq taýly aımaqty jaıaý aralap, eki pılotsyz ushý apparaty arqyly 4 shaqyrym radıýsta ushý júrgizilgen.

– İzdestirý jumystaryna Túrkistan oblysy TJ departamentiniń 25 qutqarýshysy, 2 kvadrakopteri jáne 7 tehnıkasy jumyldyryldy. Sondaı-aq polısıa departamentiniń 4 qyzmetkeri men 1 tehnıkasy, jergilikti atqarýshy organdardyń 2 qyzmetkeri men 1 tehnıkasy, UQK Shekara qyzmetiniń 3 at patrýli, ulttyq parktiń 10 qyzmetkeri men joǵalǵandardyń týystary izdestirýge atsalysýda. Aýa raıynyń qolaısyzdyǵyna (tuman, ala bult, taýly jerlerdegi naızaǵaı) baılanysty «Qazavıaqutqarý» AQ tikushaǵyn Shymkent qalasynan áýege kóterý múmkin emes, – deıdi ol.