Densaýlyq saqtaý mınıstrligi 26 mamyr kúngi epıdemıologıalyq ahýal týraly aqparatty jarıalady.
Oǵan saı, bir táýlikte 1747 adamnan koronavırýs anyqtalyp, 24 adam kóz jumǵan, 80 naýqastan pnevmonıa tabylyp, 2 adam qaıtys bolǵan.
Mınıstrlik málimetinshe, Qazaqstanda koronavırýs alǵash anyqtalǵan 2020 jylǵy 13 naýryzdan 2021 jylǵy 27 mamyrǵa deıin 381 907 adam koronavırýs juqtyrǵan. Onyń ishinde 3903 adam qaıtys bolǵan. Osy aralyqty 55024 adamnan pnevmonıa tabylyp, 3351 adam kóz jumǵan.
28 mamyrdaǵy málimet boıynsha, 30 153 adam koronavırýs ınfeksıasynan emdelip jatyr. Olardyń ishinde 11 432 pasıent stasıonarda, 18 721 naýqas ambýlatorıalyq deńgeıde em qabyldaýda.
Koronavırýsqa shaldyqqandardyń arasynda 665 adamnyń jaǵdaıy aýyr, 154 pasıenttiń jaǵdaıy óte aýyr, 101 naýqas ÓJJ apparatynda jatyr.
DSM mamyrda pnevmonıadan qaıtys bolǵandardyń sanyn kúrt kóbeıtip, oǵan 3 myńǵa jýyq adam qosqan. Mınıstrlik bul sandardyń ólgender statısıkasyna der kezinde qosylmaýyn derekterdiń qaǵazda bolyp kelýimen, elektrondyq bazaǵa kesh kirgizilýimen túsindirgen.
Qazaqstanda koronavırýs statısıkasyna baılanysty birneshe ret daý týǵan. Bastapqyda pnevmonıa statısıkasy múlde júrgizilmedi. Dúnıejúzilik densaýlyq saqtaý uıymynyń mamandary men álemniń birneshe eliniń jáne Qazaqstannyń baspasóz quraldary máselege nazar aýdarǵan soń 2020 jylǵy 1 tamyzdan bastap mınıstrlik pnevmonıa statısıkasyn júrgize bastady.
Qoǵamda bılik koronavırýstan qaıtys bolǵandar statısıkasyn ádeıi tómendetip kórsetip otyr degen pikir bar. Statısıka komıteti jarıalaǵan derekke saı, 2020 jylǵy mamyr-shilde aralyǵynda aldyńǵy jyldarǵa qaraǵanda ólim jaǵdaıy 30 myńǵa artyq tirkelgen.
DSM koronavırýs juqtyryp qaıtys bolǵan keı azamattardyń statısıkaǵa enbeýin olardyń janama syrqattardan kóz jumǵanymen túsindiredi.
2021 jylǵy 28 mamyrdaǵy málimet boıynsha Qazaqstanda 2 076 841 adam vaksına saldyrǵan.
Pikir qaldyrý