Qazaqstanda bıyl 55,7 myń adam memlekettik áleýmettik saqtandyrý qorynan jumysynan aıyrylýyna baılanysty áleýmettik tólem alady. Bul týraly eńbek jáne halyqty áleýmettik qorǵaý mınıstrliginiń baspasóz qyzmeti habarlady.

Vedomstvo málimetinshe, osy jyly áleýmettik tólem alǵandardyń ishinde 33,3 myń adamǵa alǵash ret tólem taǵaıyndalǵan.

"Qoldanystaǵy zańnamaǵa sáıkes jumystan bosatylǵan jumyskerler mindetti áleýmettik saqtandyrý júıesine qatysý ótiline jáne sońǵy 24 aıdaǵy tabysyna baılanysty 1 aıdan 6 aıǵa deıin jumysynan aıyrylýy boıynsha áleýmettik tólemder alady. Tólem joǵalǵan kiristiń 40 paıyzyna deıingi mólsherde memlekettik áleýmettik saqtandyrý qorynyń qarajaty esebinen júzege asyrylady" delingen habarlamada.

Tólem taǵaıyndaý úshin jumystan bosatylǵan jumysker aldymen eGov.kz portalyna tirkelýi kerek Munan soń "Jumysqa ornalastyrý jáne jumyspen qamtý" bóliminde "Jumys izdeýshi adamdardy tirkeý" qyzmetin tańdap, onlaın-qyzmetke tapsyrys berip, barlyq joldardy toltyrýy jáne oǵan ESQ-men qol qoıyp, ótinimdi jiberýi qajet.

Bir kún ishinde turǵylyqty jerdegi halyqty jumyspen qamtý ortalyǵy bos jumys oryndaryn usynady. Eger jumys tabylmasa, 3 jumys kúni ishinde qashyqtan jumyssyz mártebesi beriletin bolady (qajet bolǵan jaǵdaıda qosymsha aqparat jınaý úshin halyqty jumyspen qamtý ortalyǵy qyzmetkeri habarlasady).

Jumyssyz retinde tirkelý týraly málimetter bolǵan kezde Eńbekmıniniń aqparattyq júıesi proaktıvti formatta memlekettik áleýmettik saqtandyrý qorynan tólemdi taǵaıyndaý boıynsha qyzmet kórsetýge kelisý úshin mobıldi telefonǵa SMS-habarlama jiberedi. Kelisken jaǵdaıda SMS-habarlamaǵa jaýap berý qajet. Tólem avtomatty túrde taǵaıyndalady.