Almatydaǵy balalar aýrýhanasynyń dárigerleri Sharyn shatqalynda qutqarylǵan 11 jastaǵy oqýshynyń jaǵdaıy týraly aıtty.

– 31 mamyrda Tótenshe jaǵdaılar mınıstrligi 11 jastaǵy qyzdy bizdiń klınıkanyń jedel járdem bólimine alyp keldi. Qabyldaý bólmesinde qyzǵa mamandandyrylǵan medısınalyq kómek kórsetilip, neırohırýrgıa bólimshesine jatqyzyldy. Oǵan mıdyń jabyq jaraqaty, mıdyń shaıqalýy, ortasha aýyrlyqtaǵy gıpotermıa, qoly jáne aıaǵynyń kóp jeri soǵylǵan degen dıagnoz qoıyldy. Qazir jaǵdaıy turaqty, – dedi Balalar shuǵyl medısınalyq járdem ortalyǵynyń bas dárigeriniń orynbasary Alýa Jeksenova.

Onyń aıtýynsha, qyzdyń psıhologıalyq jaǵdaıy turaqty. Jaǵdaıy turaqtalǵannan keıin psıhologtar onymen jumys isteıdi. Qazirgi ýaqytta bala anasymen birge.

Eske sala keteıik, 29 mamyr kúni Almaty oblysynyń Sharyn shatqalynda sel júrip, sonyń saldarynan ekspedısıada júrgen muǵalim, ata-ana, oqýshylardan turatyn toptaǵy bir muǵalim men bir oqýshy mert bolyp, oqýshy táýlikke jýyq ýaqyttan keıin tabylǵan. Taǵy 6 adam zardap shekken.