Bilim jáne ǵylym mınıstri Asqat Aımaǵambetov Sharyn shatqalynda oqýshylardy qutqarý kezinde qaıtys bolǵan №199 gımnazıanyń muǵalimi Mereı Ibragımovtyń otbasyna kóńil aıtty. Bul týraly bilim jáne ǵylym mınıstrligi baspasóz qyzmetiniń jetekshisi Móldir Ábdýalıeva Facebook paraqshasynda jazdy.
"A. Aımaǵambetov Sharyn shatqalyndaǵy qaıǵyly oqıǵa kezinde qaıtys bolǵan muǵalim Mereı Ibragımovtyń otbasyna bardy. Ol marqumnyń týǵan-týystaryna kóńil aıtyp, 26 jastaǵy pedagogtiń ata-anasyna erjúrek jáne batyr er azamatty tárbıelegeni úshin alǵys aıtty.
Mereı Ibragımov 29 mamyr sel tasqyny oryn alǵan kúni Sharyn shatqalyna ekskýrsıaǵa barǵandardyń qatarynda boldy. Jas muǵalim oqýshylardy qutqaryp qalý úshin óz ómirin qıdy" delingen jelidegi jazbada.
Eske sala keteıik, 29 mamyr kúni Almatydaǵy Daryndy balalarǵa arnalǵan mamandandyrylǵan №199 gımnazıanyń 5 "Á" synybynda oqıtyn 8 oqýshy, 5 ata-ana, 3 muǵalimnen turatyn top Sharyn shatqalyna ekskýrsıaǵa shyqqan bolatyn.
Sol kúni tús kezinde, shatqalda sel júrip, kenetten 15 mınýt boıy burshaq aralasqan nóser jaýǵan. Oqys oqıǵa saldarynan Mereı Ibragımov esimdi muǵalim men Ranıa Qasen esimdi oqýshy qaza tapqan.
Qaza tapqan muǵalim Mereı Ibraımov 26 jasta bolǵan. Gımnazıada 3 jyl jumys istegen. Gımnazıa dırektory Sandýǵash Nyshanova qyzmetkeri Chehıada, Italıada oqyǵanyn, minezi ashyq, aqjarqyn, balalardyń súıikti muǵalimi bolǵanyn aıtady.
Pikir qaldyrý