60 mln teńge para almaq boldy dep aıyptalyp, 2019 jylǵy naýryzdan beri qamaýda bolǵan aýyl sharýashylyǵy mınıstrligi sý resýrstary komıtetiniń burynǵy tóraǵasy Islam Ábishev merziminen buryn shartty túrde bosatylady. Bul týraly májilis depýtaty, aqyn Qazybek Isa facebook paraqshasynda málim etti.

"Qazir ǵana Islam Ábishtiń advokaty Mákish Esqaraev habarlasyp, súıinshi surady. Trıllıon únemdep júrip, túrmege túsken, jazyqsyz jalanyń qurbany bolǵan Islam Ábish búgin sottyń úshinshi otyrysynda merziminen buryn shartty túrde bosatyldy! El úshin eńbek etken Erdiń bostandyqqa shyǵýy ony qorǵap, arasha suraǵan, "Qazaq úni" ulttyq portalynda prezıdentke jazylǵan Ashyq hatqa qol qoıǵan 200 myńdaı adamnyń, halyqtyń qýanyshy! Halyq únine qulaq asatyn, estıtin úkimet degenniń basy shyǵar bul!" dep jazdy Qazybek Isa.