Parlament májilisiniń depýtattary jalpy otyrysta "Qazaqstan Respýblıkasynyń keıbir zańnamalyq aktilerine azamattardyń jekelegen sanattaryn áleýmettik qorǵaý máseleleri boıynsha ózgerister men tolyqtyrýlar engizý týraly" zań jobasyn ekinshi oqylymda maquldap, senattyń qaraýyna jiberdi.

Atalǵan zań jobasy múgedektigi bar adamdardyń quqyqtaryn qamtamasyz etýdi jáne turmys sapasyn jaqsartýdy, múgedektigi bar adamdardy, múgedektigi bar balalardy tárbıelep otyrǵan otbasylardy, eńbek ardagerlerin áleýmettik qorǵaýdy kózdeıdi. 

Eńbek jáne halyqty áleýmettik qorǵaý mınıstri Serik Shápkenov búginde I toptaǵy múgedektigi bar 66 myń adamnyń árbir úshinshisi kútim járdemaqysymen de, jeke kómekshiniń qyzmetterimen de qamtamasyz etilmegenin aıtty. Onyń sózinshe, zań jobasyn qabyldaý nátıjesinde syrtqy qamqorlyqqa muqtaj 24 myń adam kútim boıynsha járdemaqymen qosymsha qamtylady.  

"Atalǵan zań jobasynyń arqasynda 7 jastan 16 jasqa deıingi múgedek balalarǵa múgedektik toby beriledi. Múgedek balalardyń barlyq toby úshin járdemaqy mólsheri 16,7%-ten 37%-ke deıin kóteriledi. Bul shara 30 myńnan astam múgedek balany qamtıdy.

Búginde múgedektigi bar balalardyń ata-analary ajyrasqan ýaqytta alımentpen múgedektigi boıynsha járdemaqy ala alady. Al ata-anasynyń bireýi nemese ekeýi qaıtys bolǵan jaǵdaıda, bala múgedektigi boıynsha nemese asyraýshysynan aıyrylý boıynsha járdemaqyǵa ıe bolady.

Otyrysta talqylanǵan zań jobasy eńbek jaraqatynan múgedek bolyp qalǵan adamdardyń memleket esebinen ońaltýǵa, múgedektigi bar balalardy tárbıelep otyrǵan otbasylardyń balalary kámeletke tolǵannan keıin turǵyn úı kezeginde turý quqyǵyn saqtaýǵa múmkindik beredi. 

Qazirgi kezde mundaı otbasylar turǵyn úı kezeginde 10 jylǵa deıin turady. Bala 18 jasqa tolǵanǵa deıin turǵyn úı berilmese, múgedektigi bar azamat kezekke qaıta turýǵa májbúr. Al jańa normanyń arqasynda 20 myńnan astam otbasy turǵyn úı kezegin saqtaı alady" delinmen mınıstrlik taratqan aqparattyq habarlamada.