Prezıdent Qasym-Jomart Toqaev Nur-Sultanda "Altyn júrek" eskertkishiniń ashylý rásiminde dárigerlerge kóterilgen járdemaqy tóleýdi jáne basqa da jeńildikter jaıly aıtty. Bul týraly Aqorda saıty habarlady.

Toqaev pandemıa kezinde memleket tarapynan dárigerler men jalpy medısına qyzmetkerlerin qoldaýǵa baǵyttalǵan yntalandyrý sharalary toptamasy qabyldanǵanyn atap ótti.

– Koronavırýspen kúreske atsalysqan dárigerlerge tólenetin tek ústemeaqy men saqtandyrý járdemaqylary úshin 180 mıllıard teńgege jýyq qarjy bólindi. Úkimet bıylǵy qazan aıyna deıin tólemaqy berýdi jalǵastyrý úshin osy maqsatqa qosymsha 71,5 mıllıard teńge bóledi. Biz dárigerlerdiń eńbekaqysyn kezeń-kezeńimen arttyrýdy bastadyq. Bul úrdis jalǵasa beredi, – dedi memleket basshysy.

Prezıdent sondaı-aq medısına qyzmetkerlerin áleýmettik turǵydan qorǵaýdyń tıimdi júıesin qurýdyń mańyzyna nazar aýdardy.

– Bul júıede aýyldyq jerge kelgen mamandarǵa mindetti túrde turǵyn úı berý, birjolǵy járdemaqy tóleý jáne basqa da jeńildikter qamtylǵan. Mundaı sharalar oblystar men qalalar ákimderiniń belsendi atsalysýymen elimizdiń barlyq óńirinde qabyldanýǵa tıis, – dedi Qasym-Jomart Toqaev

Prezıdent tek qarjylaı yntalandyrýdyń jetkiliksiz ekenin aıtty.

– Medısına qyzmetkerleriniń moraldyq jáne zańdyq jaýapkershiligi artyp keledi. Azamattar tarapynan qoıylatyn talap ta joǵary. Kóptegen maman qysymǵa shydamaı, kásibı turǵydan qajyp, densaýlyq saqtaý salasynan bas tartýda. Ókinishke qaraı, bul alańdatarlyq jaǵdaı. Atalǵan úrdis elimizde ǵana oryn alyp otyrǵan joq. Sondaı-aq búkil álemde bes mıllıonnan astam dáriger jetispeıdi. Osy oraıda medısına qyzmetkerleriniń quqyqtyq jáne áleýmettik turǵydan qorǵalýyn birtindep kúsheıtý qajet. Meniń tapsyrmam boıynsha jyl sońyna deıin medısına qyzmetkerleriniń kásibı jaýapkershiligin saqtandyrý júıesi iske qosylady, –  dedi ol.

Prezıdent medısına qyzmetkerleriniń qoǵamdaǵy mártebesin arttyrý úshin "Qazaqstan Respýblıkasynyń eńbek sińirgen dárigeri" ataǵyn engizýdi usyndy. Ataqpen birge materıaldyq syıaqy da beriledi. Onyń kólemin úkimet belgileıdi.