Nur-Sultan ákimi Altaı Kólginov qaladaǵy epıdemıologıalyq ahýalǵa baılanysty turǵyndarǵa úndeý jasady. Bul týraly ol áleýmettik jelidegi paraqshasynda jazdy.

– Biz áli de "qyzyl" aımaqtamyz. Kúndelikti COVID-2019 ınfeksıasynyń 250-300 jaǵdaıy anyqtalady. Bir jaǵynan, bul PTR testileriniń sanyn kóbeıtý arqyly, ekinshi jaǵynan, oqshaýlaý men sanıtarlyq normalardyń buzylýynan bolyp otyr. Ashyq jobasy arqyly karantın talaptarynyń óreskel buzylǵanyn kórip otyrmyz. Ózin-ózi oqshaýlaýy tıis (baılanysta bolǵan, juqtyrǵan) azamattar bar, biraq olar adam kóp jınalatyn oryndarǵa barýyn toqtatar emes. Osylaısha, koronavırýstyń taralýyna áser etip jatyr. Mundaı adamgershilikke jatpaıtyn buzýshylyqtardy toqtatyp, jolyn kesemiz, – dedi ákim.

Kólginov qala turǵyndaryn syrqattanǵan adamdardyń statısıkasyna beı-jaı qaramaýǵa shaqyrdy.

– Medısınalyq ruqsaty joq jáne áli vaksınasıalanbaǵan adamdar otpen oınap júrgenin bilmeıdi: olar erte me, kesh pe jeńiledi. Bul rette óz densaýlyǵyn ǵana emes, týystaryna, jaqyndaryna jáne qorshaǵan ortaǵa qaýip tóndiredi.

Byltyr, ıaǵnı jaǵdaı budan da aýyr kezde sanıtarlyq normalardy saqtaýdan basqa amalymyz bolmaǵan edi, al 2021 jyldyń basynan bastap vaksınasıa bastaldy. Vaksınasıa pýnktteri medısınalyq mekemelerde, sondaı-aq qala turǵyndaryna yńǵaıly bolý úshin SOO, SÚ jáne adam kóp jınalatyn basqa da oryndarda ashyldy. Vaksınasıa bárine tegin júrgiziledi, – dep atap ótti ol.

Onyń aıtýynsha, qazirgi ýaqytta stasıonarlarda 1000-ǵa jýyq adam em alýda. Tósek oryndarynyń júktemesi qazirdiń ózinde 50%-dy quraıdy.

– Qalamyzǵa qosymsha shekteýler engizgimiz kelmeıdi. Bul qala ekonomıkasyna, turǵyndardyń ál-aýqatyna áser etedi. Sonymen qatar, kúzde jańa oqý jyly bastalady. Biraq balalarymyz úshin mektepterdi qaıta asha almaımyz, – dedi Altaı Kólginov.