Parlament palatalarynyń birlesken otyrysynda májilis tóraǵasy Nurlan Nyǵmatýlın atap ótkendeı, osy sesıada parlamenttiń eki palatasynyń jumysynda májilis pen senat depýtattary ózderi bastamashyl bolǵan 24 zań jobasy boldy. Onyń 15-i osy ýaqytqa deıin qarastyrylyp, qabyldandy, dep jazady májilistiń baspasóz qyzmeti.

Zań jobalary qoǵam ómiriniń ózekti máselelerin sheshýge baǵyttaldy. Atap aıtqanda, Sot júıesi men sýdıalarynyń mártebesi týraly Konstıtýsıalyq zań, Ákimshilik quqyq buzýshylyq týraly kodekske ózgerister engizýge qatysty zań jobalary. Júrgizilgen reformalar sot júıesine jańa bilikti mamandardy jumyldyryp, ádil sot tóreligin qamtamasyz etýdi kózdeıdi. Bundaı sharalar, eń aldymen, halyqtyń sottarǵa degen senimin nyǵaıtý úshin qabyldanýda.

Sonymen qatar, depýtattar bastamasymen "Áleýmettik kásipkerlik jáne mindetti áleýmettik medısınalyq saqtandyrý máseleleri boıynsha", "Qashyqtyqtan jumys isteýdi quqyqtyq retteýdi jetildirý máseleleri boıynsha" jáne "Inklúzıvti bilim berý máseleleri boıynsha" jáne taǵy basqa da biqatar mańyzdy zań jobalaryn ázirledi.

Birinshi sesıa jumysy barysynda májilis depýtattary 233, senat depýtattary 45 depýtattyq saýaldar joldady. Olar ındýstrıalyq-ınnovasıalyq damý, qarjy, bank júıesi, bilim berý, densaýlyq saqtaý, áleýmettik qorǵaý jáne óńirlik damý, turǵyn-úı komýnaldyq sharýashylyǵy, qorǵanys, quqyq tártibi, aqparattyq qaýipsizdik jáne basqa da mańyzdy máselelerge arnaldy.

Nurlan Nyǵmatýlın májiliske ótken barlyq fraksıanyń, sonymen birge, Qazaqstan halqy assambleıasynyń depýtattary birinshi kúnnen bastap, birlese eńbek etip kele jatqanyn alǵa tartyp:

– Barlyq kúsh-jiger, bilim-tájirıbe jáne saıası jaýapkershilik – elbasymyzdyń strategıalyq bastamalaryn, sonymen birge, prezıdentimizdiń sesıa ashylýynda alǵa qoıǵan mindetterin júzege asyrýǵa arnaldy. Onyń barlyǵy, elimizdiń turaqty damýyn qamtamasyz etýge, halqymyzdyń  ómir sapasyn  arttyrýǵa  jol  ashty, – dedi.