London olımpıadasynyń chempıony Olga Rypakova men bokstan ulttyq qurama kapıtany, álem chempıonatynyń eki dúrkin júldegeri Qamshybek Qońqabaev Tokıoda Qazaqstan olımpıada quramasynyń Tý ustaýshylary retinde tańdaldy. Bul týraly Ulttyq Olımpıadalyq komıteti jarıalady.

Tý ustaýshylardy Qazaqstan Ulttyq olımpıadalyq komıteti Atletter komısıasy usynǵan.

– Tarıhı Tokıo olımpıadasynyń bastalýyna bir aıdan az ýaqyt qaldy. Saǵyna kútken Olımpıada oıyndary ótedi jáne de oǵan Qazaqstan maqtanyshpen óziniń eń úzdik sportshylaryn attandyrady. Eń laıyqtylary iriktelindi. Men Olga Rypakovanyń olımpıadanyń ashylý saltanatynda Qazaqstan Týyn alyp shyǵatynyna qýanyshtymyn. Sebebi, Olganyń arqasynda kók baıraǵymyz olımpıada kóginde bir emes, birneshe ret jelbiredi. Qamshybek Qońqabaev – qazaqstandyq sporttyń kúshi men sheberliginiń úlgisi, Olımpıada sharshy alańynda zor jaýapkershilikke ıe bolǵan boks quramasynyń kapıtany. Eki sportshy da qatarlastarynyń aldy, quramanyń kóshbasshylary jáne jas býynǵa úlgi. Qos atletke jáne barlyq olımpıadalyq quramǵa sáttidik tileımin, – dedi Qazaqstan UOK basshysy Tımýr Qulybaev.

Olga Rypakova úshin Tokıodaǵy Olımpıada onyń sport mansabyndaǵy tórtinshi olımpıada bolmaq. Ol úsh qarǵyp sekirý boıynsha 2008 jyly Beıjiń Olımpıadasynda kúmis, 2012 jyly Londonda altyn jáne 2016 jyly Rıoda qola medal jeńip alǵan.

Budan bólek, Olganyń enshisinde Ýnıversıadada altyny jáne Azıa oıyndarynyń alty altyn medali bar. Sondaı-aq ol álem chempıony jáne 2010 jylǵy qurlyqtyq kýbogtiń ıegeri.

Qamshybek Qońqabaev bokstan Qazaqstan erler ulttyq quramasynyń kapıtany. Ol 2014 jylǵy áskerıler arasynda álem chempıony, Azıa chempıonatynyń eki dúrkin jáne 2017 men 2019 jylǵy álem chempıonattarynyń kúmis júldegeri. Tokıo olımpıadasy 29 jastaǵy qyzylordalyq sportshy úshin alǵashqy olımpıada oıyndary bolmaq.

Olımpıada oıyndarynyń ashylý saltanaty 23 shildedi Tokıo olımpıada stadıonynda ótedi. Olımpıadalyq komanda Tokıoǵa jiberilgenge deıin jattyǵý bazalarynda kem degende eki apta karantınde bolady. Komanda Japonıaǵa 16 shildede attanady. Qaýipsizdik pen densaýlyqty qorǵaýdy qamtamasyz etý úshin delegasıanyń reısteri "Air Astana" áýekompanıasynyń charterlik reısterimen júzege asyrylady.

Qazaqstandyq sportshylar Tokıoda ótetin jazǵy Olımpıada oıyndaryna sporttyń 27 túrinen 96 joldama jeńip alǵan. Tórtjyldyqtyń basty dodasynda barlyǵy 339 medal jıyntyǵy sarapqa salynady.