Daryn Online respýblıkalyq bilim berý platformasynyń uıymdastyrýymen "Karantındegi bilim berý: Qazaqstan jáne Álem" atty baspasóz konferensıasy ótti.

Qazaqstandyq oqýshylardyń karantınde alǵan bilimi qandaı deńgeıde? Eldegi onlaın bilim berý júıesiniń ahýaly qandaı? Qazirgi álemdik pandemıa oqý prosesine qalaı yqpal etti? Oqýshylar úshin ońtaıly, tıimdi bilim alý júıesiniń formasy qandaı? Konferensıada osy sekildi ózekti suraqtarǵa jaýap berildi.

Konferensıada Daryn Online bilim berý platformasynyń negizin qalaýshy, ıdeıa avtory Aıbek Qýatbaı, joba keńesshisi Sadyq Sherimbek, Daryn Online platformasynyń dırektory Asqar Maqsat pandemıa kezinde bilim sapasyn jaqsartý úshin tyń josparlardy alǵa tartyp, birqatar máselelerdiń túıinin kórsetti.

– Eldiń erteńi – sanaly urpaq tárbıeleýde bilim berý isi mańyzdy ekeni belgili. Al, qazir kúlli álem betpe-bet kelgen qashyqtan oqytý júıesi – siz ben bizdi alańdatatyn búgingi kúnniń ózekti, ótkir máselesi bolyp otyr. Ótken jyldan bastap zalalyn tıgizgen pandemıa birqatar mamandyqtardy shettetip, jańa úderis pen úrdister qalyptastyrdy. Osy oraıda Daryn online bilim berý platformasy bilim kókjıegine jańa belesti baǵyndyrýda biraz yqpal jasady. Mıllıondaǵan oqýshy men myńdaǵan ustazdar onlaın bilim berý júıesine ońaı mashyqtandy,– dedi Aıbek Qýatbaı.

Bilim platformasy bilim ekojúıesin qurastyryp, barynsha sapaly qyzmet kórsetý úshin kúsh jumsaıdy. Birqatar jańa jobalardy qolǵa alyp, ýaqyt pen qashyqtyqqa qaramaı oqýshylardyń qajetti bilim alýyn qamtamasyz etýde. Osy oraıda jańashyl bilimniń jandanýyna sep bolyp otyrǵan bilim jáne ǵylym mınıstri Asqat Aımaǵambetovke zor alǵystaryn bildiredi.

– Álemge tóngen indettiń nátıjesinde biz kópten beri qolǵa alý kerek bolǵan jańa úrdiske kóshtik. Bul – "onlaın" úrdis. Álemdik bilim berý ádisterine qarasaq, onlaın format jetkilikti túrde damyp ketken. Sondyqtan pandemıa kezinde de, odan keıin de qashyqtan oqýdyń paıdasy kóbirek. Osy oraıda Daryn online platformasy Daryn Tutor, Daryn Teacher, Horda, Daryn Tandau sekildi jobalardy qolǵa alyp, kópshiliktiń ıgiligi úshin qyzmet atqarýda, – dedi  Daryn online platformasynyń dırektory Asqar Maqsat.

Baspasóz konferensıa qorytyndysy boıynsha, aldaǵy ýaqytta atqarylatyn jumystar jáne jasalynatyn jobalardyń ustazdar men oqýshylar úshin tıimdiligi saraptaldy. Qazaqstannyń bilim berý júıesin, ozat kórsetkishin álemniń alpaýyt memleketterimen teńestirý úshin birqatar joldar qarastyryldy.

Daryn online  platformasy 2018 jyldan beri onlaın rejımde sabaqtar túsirip, qashyqtan bilim berý isin damytyp keledi. Sonymen qatar platformada oqýshylardy UBT-ǵa, olımpıadaǵa daıyndaý men muǵalimderdi attestasıadan ótýge daıarlaý kýrstary qamtylǵan. Bul bilim sapasynyń deńgeıin joǵarylatyp, óskeleń urpaqtyń áleýetin kóteredi.