"Dempartıa" belsendileri 6 shilde kúni Almatyda ótken mıtıńte qamalǵan 3 jaqtasynyń qaıda ustalyp otyrǵanyn anyqtaýǵa tyrysyp júr.

Keshe Balýan Sholaq atyndaǵy sport saraıynyń mańynda Demokratıalyq partıa bastamashyl toby jáne olardyń jaqtastary mıtıńke shyǵyp, 10 jarym saǵat polısıa qorshaýynda bolǵan. Beıbit jıyn barysynda belsendiler polısıa arnaıy jasaǵymen qaqtyǵysqa túsip, Abzal Dostıarov, Temirtas Naǵımýtýllaev, Danaıa Kalıeva, Yrysbek Toqtasyn esimdi belsendiler túrli dene jaraqatyn alǵan.

Artynsha Yrysbek Toqtasyn, Dáýren Dostıarov, Ýálıhan Sultanov esimdi úsh belsendini polısıa ustap alyp ketken.

Belsendiler ketlıngten bosaǵan soń túngi ýaqytta qamalǵan jaqtastaryn izdeı bastady. Bostandyq aýdandyq polısıa basqarmasy ókilderiniń aıtqandary boıynsha Qaskeleńdegi ýaqytsha qamaý ızolátoryna barǵanynda ol jaqtaǵylar ózderine belsendilerdiń túspegenin aıtqan. Almatydaǵy Lobachevskıı kóshesinde ornalasqan ýaqytsha qamaý ızolátoryndaǵylar da belsendilerge jaqtastarynyń túspegenin jetkizgen.

Búgin, 7 shildede belsendiler jaqtastaryn izdep Almaty qalasy polısıa departamenti ǵımaratyna bardy. Olarǵa polısıa departamentiniń ókili Tórehan Isın shyǵyp, ustalǵan 3 azamat ákimshilik jazaǵa tartylǵanyn, Dáýren Dostıarov Qarasaı aýdandyq polısıa basqarmasyna, Yrysbek Toqtasyn Eńbekshiqazaq aýdandyq polısıa basqarmasyna jetkizilgenin málim etti. Sózinshe, belsendiler Alımatydaǵy ızolátorlarda oryn bolmaǵandyqtan Almaty oblysy aýdandaryna jetkizilgen. Polısıa ókili úshinshi azamat Ýálıhan Sultanov densaýlyq jaǵdaıyna baılanysty aýrýhanada jatqanyn málim etti.

Belsendiler jaqtastary qatty soqqyǵa jyǵylyp, polısıa olardy jaraqaty jazylsyn degen maqsatpen qamap qoıǵan bolýy múmkin dep qaýiptenedi.

Belsendiler búgin polısıa jaqtastaryn kórsetpese, olardyń amandyǵyna kóz jetkizbese, erteńnen bastap polısıa departamenti ǵımaraty aldynda ashtyq jarıalaıtynyn habarlady.