Bıylǵy "Slaván bazary" baıqaýynyń bas júldesin qazaqstandyq Rýhıa Baıdúkenova jeńip aldy. Bul týraly belarýstik aqparat agenttigi BelTa habarlady.

"Bas júlde úshin tartys qyzý ótti. Vokalıster bas dırıjer Vıtalıı Kýlbakovtyń basshylyǵymen Belarýstiń prezıdent orkestriniń súıemeldeýimen slaván hıtterin oryndady. Qyzý dodada bas júlde qazaqstandyq Rýhıaǵa buıyrdy. Gran-prıdi úzdik oryndaýshyǵa qazylar alqasynyń tóraǵasy Anatolıı Iarmolenko tabys etti" delingen habarlamada.

Birinshi oryndy serbıalyq Irına Arsenıevıch aldy. Ekinshi oryn – Danııl Myshkoves pen ýkraınalyq Renata Shtıfelge berildi. Al úshinshi oryndy slovakıalyq Ivanna men ázerbaıjandyq Tofık Gadjıev aldy.

Rýhıa Baıdúken 1998 jyly Taldyqorǵan qalasynda dúnıege kelgen. Ol Qazaq Ulttyq óner ýnıversıtetinde "Estrada jáne vokal" mamandyǵynda oqıdy. Onyń dıapazony – bes oktava.

Rýhıanyń "Slaván bazary" baıqaýynan basqa respýblıkalyq deńgeıde kóptegen jeńister bar.

1992 jyly bastaý alǵan "Slaván bazary" baıqaýyna qatysqan qazaqstandyq ónerpazdardyń qatarynda Altynaı Jorabaeva, Talǵat Jorabaev, Álisher Kárimov, Dınara Sultan, Marhaba Sábı jáne 2015 jyly jeńimpaz atanǵan Dımash Qudaıbergen bar.