Elordalyq qoǵamdyq densaýlyq saqtaý basqarmasynyń basshysy Tımýr Muratov "Delta" shtammynyń erekshe belgilerin atady. Bul týraly Nur-Sultan qalasy ákimdiginiń resmı saıty habarlady.

Basqarma basshysynyń aıtýynsha, koronavırýstyń "Delta" shtammynda aýrýdyń asa aýyr túri baıqalyp otyr. Sonymen qatar, bul shtamm asa biline qoımaıtyndyqtan juqtyrǵan adam aýyrǵanyn baıqamaı qalýy  múmkin.

– "Delta" shtammynyń erekshelikteri: ol agressıvti, alǵashqy ýaqytta ish qatty aýyrady. Iaǵnı pasıentterdiń kóbisi ishi, asqazany aýyratynyn aıtyp jatady. PTR-test alǵan kezde naýqastardyń ókpege aıtarlyqtaı zaqym kelgeni anyqtalyp jatyr, – dedi T. Muratov.

Onyń aıtýynsha, "Delta" shtammy óte jyldam juǵady. Onyń ınkýbasıalyq kezeńi 7 kúnnen aspaıdy, kóptegen naýqasta 3-4 kúnde ishi aýyryp, 5-6-kúnderi jótelip, ókpesi zaqymdalady.

Degenmen, basqarma basshysy vırýs qalaı mýtasıalansa da onymen kúreste vaksına saldyrý tıimdi ekenin atap ótti. 

Tımýr Muratov "Jańadan vaksınasıalanǵan adam vırýs tasymaldaýshy bola ala ma?" degen suraqqa bylaı jaýap berdi.

– Bul múmkin emes, ol adamda tiri vırýs joq. Ol aǵzada kóbeımeıdi. Vaksınanyń maqsaty – ımmýnokompetentti jasýshalarǵa jetý jáne olardy qozdyrý arqyly, ımmýnoglobýlın túrinde jaýap alý, ıaǵnı antıdene shyǵarady. Bul jasýshanyń jady paıda bolady jáne ol vırýs kelgende jetkilikti mólsherde antıdene shyǵara bastaıdy. Iaǵnı, aǵzany qorǵaý úshin belgili bir mólsherde antıdeneler árdaıym qannyń quramynda bolady, – dedi Densaýlyq saqtaý basqarmasynyń basshysy.