Jedel-qutqarý jasaǵynyń qutqarýshylary İle Alataýy taýy Mánshúk Mámetova shyńyna jalǵyz attanǵan er adamdy tapty. Bul týraly tótenshe jaǵdaılar mınıstrligi habarlady.

"Respýblıkalyq jedel-qutqarý jasaǵynyń qutqarýshylary joǵalyp ketken er adamdy M. Mámetova shyńynyń muzdyǵynan tapty. Ol qatty tońyp qalǵan, qutqarýshylar oǵan jyly kıim berdi. Medısınalyq kómekke muqtaj bolǵan joq. Qazirgi ýaqytta RJQJ jedel toby taýdan týrıspen birge túsip kele jatyr" delingen habarlamada.

Eske sala keteıik, 18 shilde kúni týrıs İle Alataýy taýlarynda joǵalyp ketken bolatyn.

Mınıstrliktiń málimetine súıensek, M. Mámetova kólinde túnegen 27 jastaǵy jigit tańerteń shyńǵa kóteriletinin aıtqan. Keshke jaqyn týrıs dosyna habarlasyp shyńdy baǵyndyrǵanyn, degenmen oǵan kómek qajet ekenin jáne  ózdiginen túse almaıtynyn aıtqan. Keıin baılanys úzilip, jedel qutqarýshylar toby izdeýge shyqqan.