Qazaqstannyń belgili kardıohırýrgi Serik Bekbosynov 41 jasynda dúnıeden ótti. Bul týraly Ulttyq ǵylymı kardıohırýrgıa ortalyǵy áleýmettik jelidegi paraqshasynda habarlady.

"Serik Bekbosynov №2 kardıohırýrgıa bólimshesiniń meńgerýshisi jáne júrek-qantamyr hırýrgıasy salasyndaǵy úzdik mamandardyń biri boldy. Ol júrektiń jasandy sol qarynshasyn ımplantasıalaý boıynsha operasıa jasaǵan álemdegi eń jas kardıohırýrg retinde Qazaqstan kardıologtary qaýymdastyǵymen marapattalǵan.

Áriptesteri men pasıentter ony meıirimdiligi men kásibıligi úshin jaqsy kórdi jáne qurmettedi" delingen habarlamada. 

Serik Bekbosynov "Densaýlyq saqtaý isine qosqan úlesi úshin" tós belgisimen marapattalǵan, Tuńǵysh prezıdent qorynyń laýreaty, ulttyq nagrada – "Eren eńbegi úshin" medalin alǵan.