Jambyl oblysynyń ákimi Berdibek Saparbaev elde ótip jatqan mıtıńterge qatysty kózqarasyn bildirdi. Bul týraly ol jýrnalıs Nartaı Aralbaıulynyń YouTube-kanalyna bergen suhbat barysynda aıtty.

– Jalpy demokratıaly memleket bolǵannan keıin demokratıa bolý kerek. Biraq mıtıńtiń de mıtıńi bolý tıis. Mysaly qazir vaksınaǵa qarsy mıtıń uıymdastyryp jatyr. Meniń oıymsha bul durys emes. Dúnıejúzi densaýlyq saqtaý uıymy vaksına almasaq indetten qutyla almaıtynymyzdy aıtty. Sonda "Qazaqstan" bólek memleket pe?! Onyń ústine bizdiń elge kelýshiler de bar, ózimiz de basqa memleketterge baramyz. Eger biz bir jaqqa baryp, órisimizdi keńeıtemiz desek – ekpeden ótip, bala-shaǵamyzdy úıretýimiz kerek, – dedi oblys ákimi.

Saparbaev byltyrǵy koronavırýstan bolǵan ólim-jitim qazaqstandyqtarǵa sabaq bolýy keregin atap ótti.

– Bizde áleýmettik jeliler arqyly ekpege qarsylyq bildirip, mıtıńke shyǵýǵa shaqyrady. Keshe ǵana "balalardyń ekpe alýyna qarsymyz" dep jazyp jiberipti. 18 jasqa deıingi balalar ekpe almaıdy. Ekpe salýǵa eshkimdi májbúrlemeıdi. Biraq aýyryp qalsa ol qaıda barady?! Árıne, aýyrǵannan keıin ol memleketke keledi. Keıin óziniń ekpeden bas tartqanyn umytyp ketedi. Onyń zıany bala-shaǵasyna, aǵaıyna, dostaryna tıedi.

Meniń oıymsha memleket qaramaı, máseleni sheshpeı jatsa, mıtıńke shyǵý kerek. Mıtıńtiń óziniń mádenıeti bolýy qajet. Biz áýesqoı, eliktegish halyqpyz. Máselen Amerıka, Eýropaǵa qarap, solaı jasaý kerek dep oılaımyz. Ol kezde eshteńe de bolmaıdy. Bizde zańda mıtıńtiń qalaı ótý kerektigi jazylǵan, – dedi Berdibek Saparbaev.