16 shilde kúni Batys Qazaqstan oblysy Bókeıorda aýdanynyń Bısen aýylynda 11 jastaǵy jasóspirim ózin karabın tapanshasymen abaısyzda atyp óltirgen, dep jazady Mgorod saıty. Aqparatty oblys ákimdigi rastady.
11 jasar bala alǵan jaraqatynan sol jerde qaıtys bolǵan.
– Otaǵasy jeke sharýaqojalyǵymen aınalysady. Qaıǵyly oqıǵa dál qalaı bolǵanyn aıta almaımyz, – dep habarlady Bókeıorda aýdanynyń ákimshiligindegiler.
Oblystyq densaýlyq saqtaý basqarmasy baspasóz qyzmetiniń málimetinshe, oqıǵa bolǵan kezde jasóspirimniń ata-anasy úıde bolmaǵan.
– Jedel járdemge qońyraý saǵat 12.30-da kelip tústi. Ókinishke qaraı, bala jedel járdem kelgenge deıin qaıtys boldy, – dedi departament ókili.
Qaıtys bolǵan bala bıyl 6-synypty bitirgen.
