Prezıdent Qasym-Jomart Toqaev ındýstrıa jáne ınfraqurylymdyq damý mınıstri Beıbit Atamqulovtyń esebin tyńdady. Bul týraly prezıdenttiń baspasóz hatshysy Berik Ýálı facebook paraqshasynda habarlady.

Prezıdent Toqaevqa memlekettik baǵdarlamalardyń júzege asyrylý barysy men ındýstrıa jáne ınfraqurylymdyq damý mınıstrliginiń bıylǵy jartyjyldyqtaǵy jumystarynyń negizgi baǵyttary týraly baıandalǵan.

Beıbit Atamqulovtyń aıtýynsha, óndiris salasynda jyl basynan bergi ósim kórsetkishi 5,6 paıyzǵa, sonyń ishinde, farmasevtıka 31 paıyzǵa, mashına jasaý salasy 22 paıyzǵa, hımıa 2,8 paıyzǵa jáne metalýrgıa 0,8 paıyzǵa artqan.

Budan bólek jyl sońyna deıin qasymsha 126-dan astam joba iske qosylady. Bul jobalarǵa 1,1 trıllıon teńge kóleminde ınvestısıa salynǵan.

Toqaevqa "Nurly jol" baǵdarlamasy aıasynda jyl basynan beri uzyndyǵy 2,2 myń shaqyrym avtomobıl joldary paıdalanýǵa berilgeni jóninde baıandaldy. Tranzıttik júk tasymaly artyp keledi, sonyń ishinde, Qytaı – Eýropa – Qytaı baǵyty boıynsha bul kórsetkish 59 paıyzǵa ósken.

"Nurly jer" baǵdarlamasy boıynsha búginde 6,6 mıllıon sharshy metr turǵyn úı paıdalanýǵa berilgen. Jyl sońyna deıin bul kórsetkishti 17 mıllıon sharshy metrge deıin jetkizý josparlanyp otyr.

Áńgimelesý sońynda Qasym-Jomart Toqaev vedomstvo jumysynyń negizgi baǵyttary boıynsha tapsyrma berdi. Ol jergilikti qatynas joldaryn damytý jáne qaıta jóndeý jumystaryn, sondaı-aq jalǵa beriletin turǵyn úılerdiń qurylysyn mańyzdy mindetter retinde atap ótti.