Shyǵys Qazaqstan oblysynda ata-anasy koronavırýsqa qarsy ekpe saldyrmaǵan balalar balabaqshaǵa kirmeıdi degen  qaýeset tarady. Densaýlyq saqtaý mınıstrligi bul aqparatty joqqa shyǵardy.

Eldiń jáne oblystyń bas sanıtar dárigerleri mundaı talaptardyń qaýlyda jazylmaǵanyn atap ótti.

"Bas memlekettik sanıtar dárigerdiń 14 shildedegi qaýlysynda mektepke deıingi mekemelerge baratyn búldirshinderdiń ata-analaryn vaksınasıalaý týraly másele qozǵalmaıdy. Balalar balabaqshalarǵa esh shekteýsiz barady" delingen mınıstrlik taratqan habarlamada.

Bas sanıtar dáriger Erlan Qıasovtyń qaýlysyna sáıkes, sońǵy 3 aı ishinde turaqty medısınalyq qarsy kórsetilimderi bar nemese COVID-19 ınfeksıasymen aýyrǵandardy qospaǵanda, vırýsqa vaksına almaǵan adamdar kúndizgi bólimde jumys isteýge jiberilmeıdi.

Bul talap bilim berý jáne tárbıeleý uıymdarynyń qyzmetkerlerine de qatysty. Alaıda atalǵan bilim berý mekemelerine baratyn balalarǵa jáne ata-analaryna vaksınasıa týraly talaptar qoldanylmaıdy.