Jýrnalıs Dýman Smaqov áleýmettik jelidegi paraqshasynda Almatydaǵy ortalyq aýrýhanadaǵy aýyr jaǵdaıǵa kýá bolǵany týraly jazba jarıalady. Ol muny  birneshe oqyrman suraǵannan keıin Facebook-ke salyp otyrǵanyn aıtady. Jýrnalıs jazbasynyń tolyq nusqasy tómende usynylyp otyr.

"Ókpemdi KTǵa túsirý úshin birneshe adamdy ortalyq aýrýhanaǵa alyp bardy. Meni basqa apparatqa túsiremiz dep bólek alyp ketti. Ol jaqty foto ne vıdeoǵa túsire almadym. Sıpattap bereıin…

Uzyn dáliz. Sharshaǵan, dálizge sharasyz qulaǵan dárigerler…

– Qyzdar, ólip baram, ólip baram, – dep janushyra aıǵaılaǵan ata, aqyryn sybyrlaǵan apa…

Sondaı qorqynyshty. Denem áli dirildep otyr…

Demala almaı jatqandardy sheshindirip, tómen qaratyp jatqyzyp qoıady eken…

– balam, kimsiń, ákimsiń be, dárigerler qarap úlgermeı jatyr… dedi bir ata. Men únsiz óte berdim…

Ókpemdi KTǵa túsirip, janymdaǵy alyp júrgen jigit ekeýimiz basqa jolmen qaıttyq.

Men sóz bastap:
- denem dirildep ketti ǵoı…
- meniń de aǵa! Tańǵy 8-den beri júrmiz. Kúnine tek men 20-30 adam ákelem…

Sol sátte dálizde jatqan dárigerlerdi kórdim. Sharshapty… Bireý qatyp jylap otyr… birin-biri jubatady… qorqynyshty…

Sol arada bizdi tasyp júrgen jigitti ary qaraı áńgimege tarttym:

- Tańǵy 8-9-dan bastap túngi 2-3-ke deıin jumys isteımiz. Otbasyn, kafeni, tipti gazdalǵan sýdy umytqaly qashan… Kúnine kemi 20-30 adamdy KTǵa aparyp, úıine ákelemiz. Kóptegen pasıenttiń ókpesi búlingen. Arasynda qınalyp, aýrýdy moıyndamaıtyndar kezdesedi. Kózimizdegi áınek te býlanyp, dym kórinbeı qalatyn da ýaqyt bolady. Ondaı kezde áshkıdi sheshýge bolmaıdy… óıtip, búıtip amaldaımyz…

Menen keıin taǵy 10-ǵa jýyq adam kezegin kútip otyr deıdi. Bul tek bizdiń mıkroýchaskidegi 1 ǵana medqyzmetkerdiń áńgimesi… bul meniń tek 10-15 mınýtta ǵana baıqaǵanym….

Aıtpaqshy, bizdiń ómirimiz úshin kúresip, aýrýdan aıyqtyrý úshin janyn salyp júrgen dárigerlerge myń alǵys!"