Sanıtarlyq-epıdemıologıalyq baqylaý komıteti "qoıý qyzyl" aımaqtarda saýda-oıyn-saýyq ortalyqtary 9 tamyzdan bastap qandaı rejımmen jumys isteıtini týraly aqparatty jarıalady.

Saıtta jarıalanǵan aqparatqa sáıkes, "qoıý qyzyl" aımaqtarda 9 tamyzdan bastap "Ashyq kóshbasshysy" mártebesi bar nysandarǵa saǵat 00.00-ge deıin, "Ashyq" júıesindegi basqa nysandarǵa saǵat 22.00-ge deıin jumys jasaýǵa ruqsat beriledi.

Bas sanıtar dárigerdiń buǵan deıingi qaýlysynda Ashyq júıesindegi saýda-oıyn-saýyq ortalyqtary "jasyl" jáne "sary" aımaqtarda shekteýsiz jumys rejımine jiberilse, "qyzyl" aımaqtarda senbi jáne jeksenbi kúnderi saǵat 10.00-den 22.00-ge deıin jumys isteýge ruqsat berilgen bolatyn.

Al "qoıý qyzyl" aımaqta saǵat 07.00-den 20.00-ge deıin qyzmet kórsete alatyny aıtylǵan edi. Endigi sheshim boıynsha atalǵan nysandardyń jumys ýaqyty 2 saǵatqa uzartylyp otyr degen sóz.

2 tamyzdan bastap Nur-Sultan, Almaty, Shymkent, Atyraý jáne Qaraǵandy qalalarynda "qoıý qyzyl" statýsqa saı shekteý sharalary engizilgen.

"№33 BMSDQ-nyń 11-tarmaǵyna sáıkes tıisti aýmaqtaǵy kóliktegi Bas memlekettik sanıtarıalyq dárigerler "Ashyq" jobasyn iske asyrý máseleleri boıynsha atalmysh Qaýlyny basshylyqqa alady jáne "jasyl", "sary", "qoıý qyzyl" aımaqtardaǵy jobaǵa qatysýshylarǵa qatysty karantındik sharalardy qatańdatý týraly sheshim qabyldaýǵa quqyly emes" delingen habarlamada.

"Qoıý qyzyl" aımaq statýsy bir apta ınfeksıalyq tósekterdiń júktelim kórsetkishi 70%-dan asqan jáne 100 myń turǵynǵa shaqqanda 200-den joǵary bolǵan óńirlerge beriledi.