Densaýlyq saqtaý mınıstri Alekseı Soı Qazaqstanda koronavırýsqa qarsy revaksınasıanyń qashan bastalatynyn aıtty. Bul týraly Coronavirus2020.kz Telegram argasynda habarlandy.

– Qazir tásilderin qarastyryp jatyrmyz. Ol eki túrli bolady. Shuǵyl revaksınasıa bar, ol jalpy ujymdyq ımýnıtet qalyptastyrýǵa deıin salynady. Al josparly revaksınasıa jylyna bir ret jasalady. Biz qazir saraptap jatyrmyz, sebebi Qazaqstan vaksınasıany salystyrmaly túrde jaıyraq, aqpan aıynan bastady. Kópshilik maýsym-shilde aılarynda ekpe aldy. Bizdiń antıdeneler áli de jańa, deńgeıi joǵary. Sondyqtan ekinshi dozany alǵannan keıin shamamen 9 aı ótken soń,  kúntizbege qosatyn shyǵarmyz, – dedi mınıstr.

Osylaısha mınıstr muny áriptesterimen talqylap jatqanyn, DDSU-men keńesetinin atap ótti. Revaksınasıa týraly birinshi kezekte ótken jyly vaksınasıalanǵan elder – AQSH, Izraıl, Reseı aıtqan.

– Olardyń alǵashqy vaksınany alǵanyna 9 aıdan asty. Qazaqstanda revaksınasıa qazan aıyna ózekti bolady, sebebi bizdiń azamattar alǵashqy ekpeni aqpan aıynyń basynda alǵan, – dep aıtty densaýlyq saqtaý mınıstri.