Belarýs prezıdenti Aleksandr Lýkashenko baspasóz máslıhaty kezinde kútpegen jańalyqty jarıalady. Ol "tez arada prezıdenttikten ketýge daıyn" ekenin jáne 15 nemese 20 yqtımal izbasarlary bar ekenin málimdedi.

Biraq eldi 27 bılegen basshy óziniń "zeınetker" bolǵysy kelmeıtinin de aıtty.

Brıfıńte Lýkashenko bılikti ustap qalý úshin qandy repressıa júrgizgenin joqqa shyǵardy jáne óziniń dıktator emes ekenin aıtty.

"Álemdi jalǵandyq, aldaý, jek kórý, qorqytý, trollıng, bottar jáne basqa da komýnıkasıalyq tehnologıalar jeńdi" dedi ol.

Ótken jyly táýelsiz sarapshylar Belarýs prezıdenttik saılaýyndaǵy nátıjelerdiń burmalanǵanyn málimdedi.

Keıinirek narazylyq bildirýshiler búkil el boıynsha buryn-sońdy bolmaǵan kólemdi demonstrasıalarǵa shyqty. Kóp ótpeı jappaı qýǵyn-súrgin oqıǵalary boldy: myńdaǵan narazylyq bildirýshiler qamaýǵa alyndy, júzdegen adam azaptaldy jáne segiz adam óldi.

Lýkashenko oponentter men jýrnalıserge qarsy 4600-den astam qylmystyq is qozǵady, 600 saıası tutqyn rejımdik túrmede qamaldy. Olardyń qatarynda prezıdenttiń elden kete almaıtyn qarsylastary da bar.

Mamyr aıynda Lýkashenko myrza opozısıalyq jýrnalıs Roman Protasevıch mingen komersıalyq ushaqty májbúrli qondyrýǵa buıryq berdi. Sodan keıin 2 tamyzda qýǵynǵa ketken belarýs belsendisi Vıtalıı Shıshov Kıev saıabaǵynda kúdikti jaǵdaıda asylyp óldi. 

Degenmen, Lýkashenko bul shekten shyǵýlarǵa qatysy joq ekenin aıtty.

Ol túrmelerde júzdegen adamdy fızıkalyq azaptaýǵa buıryq bergeni týraly dálelderdi de joqqa shyǵardy. Lýkashenkonyń aıtýynsha, bul jalǵan aqparat.

Aıta keteıik, jaqynda AQSH, Kanada jáne Ulybrıtanıa sıaqty elder Belarýs ekonomıkasyna jáne Olımpıadalyq komıtetine qarsy baǵyttalǵan jańa sanksıalar salatynyn jarıalady.