Bıyl Qazaqstannan shetelge kóshkender zeınetaqy qorynan 17 mıllıard teńgeden astam qarajat alǵan. Bul týraly  31-arnanyń Informbúro baǵdarlamasy málimdedi.

Qazaqstannan birjolata ketip, ózge eldiń azamattyǵyn alǵan 8 myńnan astam adam osy jyly zeınetaqy qoryndaǵy qarajatyn sheship aldy. Bul – 17 mıllıard 3 mıllıon teńge. Zeınetaqy qory 2,2 mıllıard teńgeniń 860 tólemin ulttyq valútada berse, 14 mıllıard teńgeni rúblge konvertasıalap aýdarǵan.

Al AQSH dollarymen 500 mıllıon teńgege teń soma berilgen. Eýromen 200 mıllıon teńge, fýnd sterlıńpen 50 mıllıon teńgeniń tólemi júrgizilgen. Barlyq qarjylyq operasıa ulttyq banktiń resmı baǵamyna sáıkes eseptelingen. 

Qordaǵy qarajatty sheship alǵandardyń 7 myń 300-den astamy Reseıge, 71-i Germanıaǵa ketken. Belarýs eline qonys aýdarǵandar sany – 36. Odan keıin 18 tólem tikeleı AQSH-qa jiberilgen. Ózbekstanǵa tek 10 adam tólem jasaýdy suratqan. Al sarapshylar pikirinshe, Qazaqstannan bilimdi jastar men bilikti mamandardyń ketip jatyr.

– Bul jerde eki sanatqa bólýge bolady. Jastardyń jáne orta belden asqan azamattardyń ketýi dep. Jastardyń ketýiniń birden-bir sebebi – ishki potensıalyn, oı-jigerin Qazaqstanda júzege asyra almaýy. Al orta belden asqan azamattar tapshy mamandar qataryn tolyqtyrý úshin ketip jatyr. Keńes ókimeti kezinen saqtalǵan ınjener, tehnologtar sekildi mamandyqtar qazir shet memleketterde joǵary suranysqa ıe, – dedi ekonomıs Maqsat Seráli. 

Sarapshylar qonys aýdarǵandardyń ishinde baıyrǵy Otanyna qaıta ketkenderdiń de az emes ekenin aıtady. Biraq, jastardyń kóbi sheteldik kompanıalardyń usynatyn áleýmettik paketterine qyzyǵyp júrgen kórinedi.

Aıta keteıik, jınaqtalǵan zeınetaqy qarajattary basqa eldiń azamattyǵyn alǵan jaǵdaıda ǵana beriledi. Al shetelde ýaqytsha turatyndarǵa mundaı múmkindik joq. Qazaqstanǵa kelýshilerden qaraǵanda elden ketip jatqandardyń sany basym. Máselen, osy jyldyń qańtar-mamyr aralyǵynda elimizge turǵylyqty turýǵa kelgenderdiń sany 3 662 adam bolsa, ketkenderdiń sany 10 myńǵa jýyq adamdy quraıdy.