Almaty oblysyna qarasty Kemertoǵan aýylynyń aınalasy órtenip jatyr. Aýyl turǵyndarynyń aıtýynsha, tútinge tunshyǵyp otyrǵanyndaryna búgin úshinshi kún. "Qamshy" redaksıasyna habarlasyp, kómek suraǵan turǵyndar ákimdik tarapynan qajetti kómek kórsetilmeı jatqanyn jetkizdi.

Kemertoǵandyqtar qazir jeldiń baǵytyn ańdyp otyr. Óıtkeni jel qaıda soqsa, órt sol baǵytqa qaraı jyljyp, aýylǵa jaqyndap keledi. Ákimdik tarapynan órtti sóndirýge ýáde bergen. Alaıda qoıý tútinniń ishine tehnıka kire almaǵan. 

Al traktorshylar bolsa sıyr fermasyna qaraıtyn aýmaqqa maldyń qıy tógilgendikten, traktor batyp, tehnıkamyz órtenip ketedi dep saqtanyp otyr.

Aýyl turǵyndarynyń sózinshe, órt sóndirýshiler búgin úshinshi kún degende qarasyn kórsetken. Biraq órt bolyp jatqan aımaqqa sýsyz kelgen. Keıinnen ekinshi kólik kelip, órtti sóndire bastaǵanymen kúshi jetpegen. 3 kúnnen beri janyp jatqan órt aýmaǵy shamamen 5-6 gektar aýmaqty quraıdy.

– Aýylda demikpe aýrýymen aýyratyndar kóp, terezemizdi japsaq ta, tútin úıge kirip ketip jatyr, – deıdi Kemertoǵan turǵyny Aısulý Seıdahmet.

"Aýyl ishinde sıyr fermasy bar. Byltyr da tezegin ferma syrtyna tógip, oınap júrgen bala batyp ketken bolatyn. Endi sol tezek tutanyp, birneshe kúnnen beri aýyldy tútin basty" deıdi turǵyndar.

Qarasaı aýdany ákimdiginiń baspasóz hatshysy Baqdaýlet Talıpov alapat órtke qatysty pikir bildirdi.

– Kemertogan aýylynyń soltústik jaǵynda ornalasqan alqapta egistikke tógilgen qı (navoz) órtengen bolatyn. Shamamen 7 gektardy alǵan órttiń aldyn alýǵa 3 sý tasymaldaıtyn arnaıy kólik pen 1 traktor jumyldyryldy. Órt aýyzdyqtalǵanymen, tútin toqtamaı tur. Qazirgi kezde, ony tolyǵymen óshirýge barlyq is-sharalar jalǵasýda. Adam ómirine eshqandaı qaýip tónip turǵan joq, – deıdi baspasóz hatshysy.