Shymkent qalasynyń barlyq aýdan aýmaqtarynda qysqy jylytý maýsymynda qaýipsizdik sharalaryn saqtaý boıynsha aqparattyq-túsindirme jumystary jalǵasyn tabýda.

Jylý maýsymy bastalysymen-aq órt pen gazdan ýlaný faktileri kóbeıedi. Kóbine oǵan páter ıeleriniń qarapaıym qaýipsizdik erejelerin saqtamaýy sebep. Jaýapty sala mamandarynyń sózinshe, qaıǵyly oqıǵalardyń kópshiligi turmysy tómen otbasylar turatyn úılerde tirkeledi.

Qaıǵyly jaǵdaıdyń aldyn alý úshin tótenshe jaǵdaılar departamenti tarapynan 1 102 memlekettik ataýly áleýmettik kómek alýshy azamattardyń úılerine gaz dabyl qaqqysh qurylǵysy ornatylǵan. Ótken jyly turmys jaǵdaıy tómen 10 otbasyǵa pılottyq jobada gaz dabyl qaqqysh ornatylǵan bolatyn. Nátıjeside eki ret dabyl berip, 5 adam ýly gazdan ýlanýdan aman qaldy. Osy jumystar demeýshiler esebinen jasalynǵan.

Jalpy Shymkent qalasynda ataýly áleýmettik kómek alýshy 34 862 otbasy bar. Osyny eskere otyryp bıylǵy jyly 5 myń dana dabyl qaqqysh qurylǵysyn ornatý josparlanýda. Bul quraldyń ereksheligi qatty jáne suıyq otynnan ýly gaz bólinip bólmege tarasa der kezinde dabyl qaǵady.

Sonymen birge mamandar murjany udaıy tekserip, gaz jabdyqtary ornatylǵan bólmege aýanyń kirýin qamtamasyz etý qajettigin eskertedi. Osy qarapaıym erejelerdi saqtaı otyryp, ózińizdiń jáne jaqyndaryńyzdyń ómirin saqtaısyz!