Túrkistan oblysy Qostóbe aýylyndaǵy mektep apatty jaǵdaıda tur. Bul týraly 31 telearna habarlady. 

Turǵyndardyń sózinshe, osydan 10 jyl buryn soǵylǵan mektepke 200 mln teńge qarjy jumsalǵan. Alaıda bilim ǵımaratynyń búgingi sapasy syn kótermeıdi. Qabyrǵalary jarylyp, sylaqtary túsip, eden opyrylyp túsýge shaq tur.  Al 1 qyrkúıek bolsa jaqyndap keledi.

– Bizdiń balalarymyz munda qalaı oqıdy? Mektepti soqqan merdiger kepildik merzimi aıaqtaldy dep, sapaǵa jaýap bermeıdi. Mektep 150 oqýshyǵa arnalǵan, biz balalarymyzdy jiberýge qorqamyz, –  deıdi Qostóbe aýylynyń turǵyny Tastan Qýatbekov. 

Al aýdandyq bilim basqarmasynyń ókili, bári ata-analar aıtqandaı qorqynyshty emes, tek mektep asqanasy men "B" korpýsy jóndeýdi qajet etedi deıdi. 

– Mektepke kúrdeli jóndeý júrgizý úshin jobalyq-smetalyq qujattamany daıyndap, 6 mln 939 myń teńge bólý týraly oblystyq basqarmaǵa tıisti hat joldadyq, – dedi Tólebı aýdany adamı áleýetti damytý bóliminiń mamany Pernebek Asanov.

Aýdandyq bilim bólimi, ǵımaratty 2022 jyly tolyǵymen jóndeletinin aıtty. Dese de jańa oqý jylynda balalar mektepke barady. Al atalǵan B korpýsy jóndeý aıaqtalǵanǵa deıin jabyq turady.