Jasandyserikten túsirilgen sýretter Kabýldyń negizgi áýejaıyndaǵy beıbereket kórinisterdi kórsetti. Talıban kúshteri Aýǵanstandy baqylaýǵa alǵannan keıin myńdaǵan úmitsiz aýǵandar shetelge qashýǵa tyrysyp jatyr.

Fotosýretterde azamattyq ushaqtardy qorshap turǵan adamdardyń qalyń toby kórinedi. Kabýlde keıbir reıster toqtatylǵan.

Buǵan deıin áleýmettik jelilerde AQSH-tyń áskerı ushaqtaryna ilesip júgirip kele jatqan adamdardyń vıdeolary taraǵan, tipti keıbireýler ushý kezinde ushaqqa jabysqan. Birneshe adam ushaqtan qulap qaza tapqan. 

Londonnan habar taratatyn The Daily Mail basylymy áýejaıda jalpy segiz adam qaıtys bolǵanyn habarlady. Olardyń ekeýin AQSH áskerleri atyp óltirgen, úsheýi reaktıvti ushaqtardan qulap qaza tapqan, úsheýi kóterilgen ushaqtardan qulap kóz jumǵan. Al, keıbir aqparattar jeti adam qaıtys bolǵanyn jazady.

Málimetterge sáıkes, Talıban da, AQSH áskerleri de halyqty taratý úshin eskertý oǵyn atqan, al amerıkalyq sarbazdar halyqty tynyshtandyrý úshin Apache tikushaǵyn qoldanǵan.

Vashıngton sheneýnikteri Katar astanasy Dohada táliptermen kezdesip, AQSH dıplomatıalyq qyzmetkerleri men amerıkalyq kúshterge kómektesken aýǵandardy evakýasıalaýdy jalǵastyrý týraly kelisimge keldi.

Jasandyserikten túsirilgen sýretterde shetel kúshterimen baılanysy joq beıbit aýǵandar da áýejaıǵa aǵylǵany kórinedi. Keıbireýleri kólikterin kóshe ortasynda qaldyryp ketkeni, qaraqurym halyqtyń áýejaıǵa jınalyp, qashýǵa tyrysyp jatqany baıqalady. Tipti el ishinde áskerı kúshtermen resmı baılanysy bar adamdar da Kabýldan ketýde qıyndyqtar bolǵanyn habarlady.

– Biz talipterdiń áskerı qyzmetkerlerdi jappaı óltirgeni týraly vıdeolardy jáne Kandagar men basqa da iri qalalarda beıbit turǵyndardy nysanaǵa alǵan vıeolardy kórdik. Keıbir aýdandarda (tálipter) tizim jasap, úılerdi aralap izdep adamdardy óltirip jatqany týraly aqparat kelip túsip jatyr. Qazirdiń ózinde qalada nysanaǵa alynǵandar men tonaý jaıttary týraly habarlar bar. Kabýl turǵyndary dál qazir qorqynyshpen ómir súrýde, – deıdi Aýǵanstannyń BUU-daǵy elshisi Gýlam Isakzaı.