Qamshy.kz saıty 2021 jylǵy 19 tamyzda jarıalanǵan «Topas» dep balaǵattaıtyn biliksiz basshy kerek emes». Merkilik 17 pedagogtyń janaıqaıy» atty maqaladaǵy Jambyl oblysy Merki aýdany Ańdas batyr okrýgy Granıtogor kentinde ornalasqan "Kóp balaly jáne az qamtamasyz etilgen otbasylardyń balalaryna arnalǵan mektep-ınternat dırektory Danara Elemesovaǵa oqý ordasy muǵalimderiniń tarapynan taǵylǵan aıyp dáleldenbegenin habarlaıdy.

Maqalada aty-jónderin atamaýdy ótingen muǵalimder basshylary Danara Elemesovany «jemqorlyqpen aınalysyp otyr», «mektep-ınternatty bıznes kózine, jekemenshik saýdamen aınalysatyn orynǵa aınaldyryp jiberdi», «mekemeniń jóndeý jumystaryn sapasyz júrgizdi», «muǵalimderdi balaǵattaıdy» dep aıyptaǵan.

Al «Kóp balaly jáne az qamtamasyz etilgen otbasylardyń balalaryna arnalǵan mektep-ınternat dırektory Danara Elemesova qol astyndaǵy pedagogterdiń aıtqandaryn tolyqtaı joqqa shyǵaryp, olardyń taqqan aıyby dálelsiz ekenin jetkizgen. Qyzmetkerleriniń aıyptaý sebebin bilmeıtinin aıtqan.

2021 jylǵy 4 qarashada Qamshy.kz portalynyń redaksıasyna Danara Elemesovanyń atynan suranys hat (shyǵys nomeri №00-126 ) kelip tústi. Ol jerde joǵaryda sóz bolǵan maqalada ózine taǵylǵan aıyptar boıynsha quzyrly organdar tergeý júrgizip, zań buzýshylyqtarǵa jol berilgeni dáleldenbegeni, sondyqtan maqaladaǵy aıyptaýlardy teriske shyǵarýdy suraıtyny jazylǵan.

Sondaı-aq Danara Elemesovanyń resmı ókili, advokat Aıda Kasymbekova Qamshy.kz portalynyń redaksıasyna muǵalimderdiń aıyptary negizinde Merki aýdandyq prokýratýrasy zerdeleý jumystaryn júrgizip, «paraqorlyq, zorlyq zombylyq» týraly ýáj dáleldenbegeni jazylǵan Jambyl oblysy Bilim basqarmasynyń hatyn joldady.

Qamshy.kz saıty «Kóp balaly jáne az qamtamasyz etilgen otbasylardyń balalaryna arnalǵan mektep-ınternat» dırektory Danara Elemesovadan atalǵan maqalanyń jarıalanýyna baılanysty keshirim suraı otyryp, sóz bostandyǵy, pikir alýandyǵy qaǵıdalary jáne QR BAQ týraly zań normalary negizinde atalǵan maqaladaǵy dáleldenbegen málimetterdi teriske shyǵarady. Jáne de Qamshy.kz saıty ustanymy sóz bostandyǵy men barlyq taraptyń da pozısıasyn jarıa etý, beıtarap aqparat taratý ekendigin málimdeıdi.