Shymkentte sel qaýpininiń aldyn alatyn monıtorıń júrgizý júıeleri ornatyldy. Bul jóninde búgin qala ákimine birinshi jarty jyldyqta atqarylǵan jumystar jaıyn baıandaǵan Shymkent qalasy tótenshe jaǵdaılar departamentiniń basshysy Madıar Jaqsybaev málim etti.

Sý aıdyndaryndaǵy jaǵdaıdy odan ári taldaý úshin derekter Departamenttiń daǵdarys ortalyǵynyń jedel basqarý púltine GSM nemese radıoarnalar arqyly kelip túsedi. Dachık últradybystyq tolqyndardyń kómegimen sáýle taratqyshtan sý betine deıingi qashyqtyqty mıllımetrge deıingi dáldikpen anyqtaıdy.

Madıar Jaqsybaev, Shymkent qalasy tótenshe jaǵdaılar departamentiniń basshysy
- «2020-2021 jylǵy sıfrlandyrýdy jáne sıfrlyq ınfraqurylymdy damytý» Jol kartasynyń aıasynda qala aýmaǵynda sel qaýpiniń aldyn alý maqsatynda táýlik boıy baqylaý úshin Badam ózeni, Badam jáne Toǵys sý qoımalarynda sý tógilý men sý tasqyny jaǵdaıyna monıtorıń júrgizý júıeleri ıaǵnı, dachıkter ornatyldy.

Jalpy qala aýmaǵynda 4 sý qoımalary - Badam (61,5 mln.m3), Toǵys (4,6 mln.m3), Akjar (0,6mln.m3), Tekesý (1 mln.m3) ornalasqan. Sonymen qatar qala aýmaǵynan 3 ózen - Badam, Qoshqar-ata, Saıram-sý jáne 30-dan astam kanal aǵyp ótedi. Qazirgi tańda, sý qoımalarynyń jaǵdaılary qanaǵattandyrarlyq.

Sý tasqynynyń aldyn alý jumystary jiti baqylaýda bolý qajettigin aıtqan qala basshysy ózenderden bastaý alatyn arnalardy tazalaýdy tapsyrdy.