Talıban qozǵalysynyń ókili halyqaralyq kúshterdiń evakýasıa merzimin uzartýǵa kelispeıtinin aıtty. Alaıda AQSH prezıdenti Djo Baıden evakýasıa merzimin uzartatyn sheshim shyǵarady dep kútilýde.

Seısenbide ótetin G7 samıtinde Ulybrıtaná premer-mınıstri Borıs Djonson AQSH áskerleriniń Aýǵanstanda qalý merzimin uzartýdy suraıtynyn aıtty.

Ulybrıtanıanyń Qarýly kúshter mınıstri Djeıms Hıppı "Bul G7 basshylary arasynda bolatyn talqylaý emes, bul Talıbanmen bolatyn talqylaý" dedi kezdesý jaıly.

Fransıa da evakýasıany aıaqtaý úshin kóbirek ýaqyt qajet ekenin aıtyp, merzim taıaǵan saıyn p alańdaýshylyq bildirýde.

Germanıa syrtqy ister mınıstri Heıko Maas NATO odaqtastarymen jáne Talıbanmen Kabýl áýejaıynda belgilengen merzimnen keıin de ashyq ustaýdy talqylap jatqanyn aıtty.

Senbide Eýropalyq Odaqtyń syrtqy saıasat jónindegi basshysy Hosep Borrell on myńdaǵan aýǵan qyzmetkeri men olardyń otbasyn belgilengen merzimge deıin evakýasıalaý "matematıkalyq turǵydan" múmkin emestigin aıtty.

G7 basshylary kezdesken kezde AQSH prezıdenti Djo Baıden Aýǵanstandaǵy evakýasıany uzartý týraly sheshim qabyldaıdy dep kútilýde.

Aqparattarǵa qaraǵanda, Djo Baıden seısenbide evakýasıany 31 tamyzdan keıin jalǵastyrý týraly sheshim qabyldaıdy. Bundaı boljam týraly Ál-Jazıra jáne Germanıanyń DW basylymy jazdy. AQSH palatasy barlaý komısıasynyń tóraǵasy evakýasıa prosesiniń 31 tamyzdan buryn  aıaqtalýy "ekitalaı" ekenin aıtty.

Baıden Kabýl áýejaıyndaǵy qaıǵyly kórinisterdi rastap, evakýasıa kezinde adam shyǵyny, "júrekti aýyrtatyn kórinister" bolatynyn aıtty.

Al Talıban jaǵy halyqaralyq kúshterdiń evakýasıa merzimin uzartýǵa kelispeıtinin jarıalap, onyń "aýyr saldary" bolatynyn málimdegen.