Mektep dırektorlary muǵalimderdi jumyska qabyldaı alady. Alaıda men myna muǵalimdi qabyldaımyn nemese qabyldamaımyn dep ózi jeke sheshim shyǵara almaıdy. Bul týraly bilim jáne ǵylym mınıstri Asqat Aımaǵambetov málimdedi. 

– Endi mektep dırektory kelgen rezúmeni qabyldap, konkýrstyq komısıa jasaqtaıdy. Oǵan mekteptegi áriptesteri, tıisti baqylaýshy organdar jáne kásipodaq kiredi. Al konkýrska qatysatyn úmitker qujattaryn tapsyrǵanda ár qujatyna 10 baldan qosyp otyrady. Mysaly qyzyl dıplomyna, respýblıkalyq nemese halyqaralyq olımpıada júldegerlerin daıyndaǵan sertıfıkatyna 10 baldan qosyp, óziniń balyn bilip otyrady. Sol jınalǵan bal boıynsha, komısıa sheshim qabyldaıdy. Kimde kóp bal shyqsa, sol jumysqa qabyldanady, –  dedi mınıstr. 

Aımaǵambetov bul jemqorlyq, týystyq arqyly jumysqa ornalasý táýekelderimen kúresýge múmkindik beredi degen pikirde. Atalǵan táýekelder Ońtústik aımaqtarda jıi kezdesip, aryzdar kóptep túsetinin aıtqan ol ashyq qaǵıdasy arqyly konkýrstan ótken ustazdar ǵana jumysqa qabyldanatynyn jetkizdi.