Jambyl oblysy Baızaq aýdanydaǵy №28349 áskerı bóliminiń oq-dári qoımasynda bolǵan jarylystardan 4 adam qaza tapty. Bul týraly Jambyl oblysy óńirlik komýnıkasıalar qyzmetinde ótken brıfıńte qorǵanys mınıstri Nurlan Ermekbaev málim etti.

Qaza tapqandardyń ekeýi kelisim-shart boıynsha qyzmet etken. Serjant Marat Meshinbaı Saılaýuly men efreıtor Rýslan Janbolatov Júrsinbaıuly 1981 jyly týǵan. Úshinshi adam áskerı kúzet qyzmetkeri Orazbek Dálibaev Daırabekuly 1969 jyly týǵan. Qaza tapqan tórtishi adam áskerı prokýror Arman Qapezov ekeni anyqtaldy.

Marat Meshinbaı men Rýslan Janbolatov órt bastalǵan alǵashqy sátterde órt sóndirýshiler sapynda jalyndy óshirýmen aınalysqan. Sol jerdegi jarylystardyń birinde jaralanǵan.

Al Orazbek Dálibaev qoımany kúzetip turǵanda jarylys bolyp, sonyń saldarynan kóz jumǵan.

Jalpy 88 adam aýrýhanaǵa júgingen. Qazirgi ýaqytta 28 adam aýrýhanada jatqany, olardyń arasynda 6 adamnyń jaǵdaıy aýyr ekeni, is-tússiz joǵalǵandardyń bary habarlandy.

Mınıstrdiń aıtýynsha, qazirgi ýaqytta qoımalardaǵy órt sóndirilgen, jarylys qaıtalanbaǵan. Ol keshigi túnde áskerı bólimde 10-nan astam jarylys bolǵanyn aıtty.

Sondaı-aq ol qoımadaǵy zarádtalmaǵan snarádtar Arys áskerı bóliminen jetkizilgen qarýdyń qaldyǵy ekenin jetkizdi.

Mınıstr brıfıńten soń Azattyq radıosy tilshisiniń otstavkaǵa ketý týraly suraǵyna jarylys bolǵanyn estigen alǵashqy sátte otstavkaǵa ketý týraly oılaǵanyn, otstavka týraly aryz jazatynyn, sheshimdi basshylyq qabyldaıtynyn málim etti.

Keshe Jambyl oblysy Baızaq aýdanyndaǵy áskerı bólimde saǵat 19:00 shamasynda qoımalardyń birinen órt shyǵyp, onyń sońy jarylysqa ulasqan. Apat bolǵan jerge jaqyn Qaınar, Bazarbaı, Úsh-Bulaq, Jańaturmys aýyldarynyń turǵyndary evakýasıalanǵan. Temir jol baılanysy ýaqytsha toqtap, Taraz qalasyna kirý, shyǵý shektelgen.

Osydan 2 jyl buryn Arys qalasynda áskerı qoımada iri jarylys bolyp, 5 adam qaza tapqan. Ol kezde 50 myńnan astam adam turatyn qala tolyq evakýasıalanǵan.