Jambyl oblysy Baızaq aýdanynda órt shyqqan áskerı qoımada taǵy da jarylys boldy. Bul týraly qorǵanys mınıstrligi habarlady.
"26 tamyzda órt shyqqan ınjenerlik oq-dáriler qoımasynyń aýmaǵynda búgin, 29 tamyz kúni saǵat 12:20 shamasynda jarylys daýsy estildi. Qaza tapqandar men zardap shekkender joq, oqıǵa ornynda adam bolmaǵan" delingen resmı saıt taratqan habarlamada.
Tótenshe jaǵdaıdyń sebepteri anyqtalyp jatyr.
26 tamyz saǵat keshki 19:00 shamasynda Jambyl oblysy Baızaq aýdanynda áskerı bólim qoımalarynyń birinen órt shyǵyp, artynsha 10-nan astam jarylys bolǵan.
Sońǵy málimet boıynsha oq-dári qoımasyndaǵy jarylystan 13 adam qaza tapqan. Olardyń arasynda áskerı qyzmetshiler, órt sóndirýshiler, qutqarýshylar, áskerı prokýror bar. Taǵy 3 adam izdestirilip jatyr.
Búgin, 29 tamyz Qazaqstanda Jalpyulttyq aza tutý kúni bolyp jarıalandy. Prezıdent Qasym-Jomart Toqaev áskerı jáne qyzmettik boryshyn atqarýda kórsetken erligi men janqıarlyǵy úshin Jambyl oblysynda áskerı qoımadaǵy jarylystan qaza tapqan azamattardy memlekettik nagradamen marapattady.
