Aýǵanstandaǵy basqarýdy óz qolyna alǵan tálipter elde mýzykaǵa tyıym saldy. Bul týraly The New York Times basylymy habarlady.
Talıban ókili Zabıhýlla Mýjahıd Nú-Iork Taıms tilshisine bergen suhbatynda bul málimdemeni rastady. Belgili bolǵandaı Talıban kúshteri Aýǵanstannyń halyq ánshisi Favad Andarabıdi úıinen urlap áketip, kúshtep óltirgen.
– Mýzykaǵa ıslamda tyıym salynǵan. Biz adamdardy soǵan tárbıeleımiz dep úmittenemiz. Endi bári ózgeshe, basqasha bolady, – dedi Talıban ókili.
Burynǵy ishki ister mınıstri Mesýd Andarabı áleýmettik jelidegi paraqshasynda halyq mýzykasy ártisin óltirgenin habarlady.
"Tálipterdiń qatygezdigi jalǵasýda. Búgin olar aýǵan halqynyń súıikti ánshisi Favad Andarabıdi aıaýsyz óltirdi. Bizdiń ata-babalarymyzdyń jeri eshqashan Talıban ozbyrlyǵyna bas ımeıdi" dep jazylǵan habarlamada.