Búgin jetinshi shaqyrylymdaǵy Shymkent qalasy máslıhatynyń kezekten tys segizinshi sesıasy ótti. Sesıanyń kún tártibinde 6 másele qaralyp, bekitildi.

Sesıa jumysyna qala ákimi Murat Áıtenov qatysty. Jıyn barysynda qala ákimdiginiń qyzmetine qatysty salalar boıynsha áleýmettik máni bar qoǵamdyq kólik qatynastarynyń tizbesine qosymsha marshrýttar engizý máselesi qaralyp, baǵany turaqtandyrý baǵytynda atqarylǵan jumystardyń esebi tyńdaldy. Sondaı-aq mektepter men mektepke deıingi bilim berý uıymdaryndaǵy bilim sapasy máselesi talqylandy.

Jıyn barysynda sóz alǵan qala basshysy, sesıa jumysynda qala úshin mańyzdy sheshimder qabyldanǵandyǵyn atap ótti. Onyń ishinde jolaýshylar tasymalynda áleýmettik máni bar qosymsha 7 avtobýs marshrýttarynyń ashylýy qoǵamdyq kólik salasyn júıelendirý jumystarynyń nátıjesinde iske asqandyǵyn málimdedi. Buǵan deıin 57 baǵyt boıynsha áleýmettik marshrýttar túzilse, búgin olardyń sany 64-ke jetkendigin habarlady. Marshrýttar júıesin qalyptastyrýda depýtattar tarapynan bildirilgen syn-eskertpeler nazarǵa alynyp, olar boıynsha ońtaıly sheshimder qabyldanatynyn jetkizdi.

Qoǵamdyq kólik qatynasymen barlyq 81 eldi mekendi qamtý boıynsha júıeli jospar túzilgendigin, onyń oryndalý kórsetkishi 82 paıyz bolyp otyrǵandyǵyn aıtty.

Baǵany turaqtandyrý boıynsha Memleket basshysynyń tapsyrmasy bar ekendigin nazarǵa alǵan qala ákimi, áleýmettik mańyzy bar azyq-túlik taýarlary baǵalarynyń ósýine jol bermeý baǵytynda naqty jumystar atqarylyp otyr dedi. Onyń ishinde iri jelilik saýda ortalyqtaryna qaıtarymdy aınalym qarajaty berilip, áleýmettik máni bar azyq-túlik taýarlaryna baǵa turaqtylyǵy qamtamasyz etilgen. Bul maqsatqa bólinetin qarajat jyldan-jylǵa arta beretinin atap ótti.

Qala kóleminde bilim salasyna erekshe kóńil bólinip jatqandyǵyn aıtqan qala basshysy, bul máselede máslıhat depýtattary tarapynan úlken qoldaý bop jatqandyǵyn aıtty. Bilim sapasyn arttyrýda maqsatty jumystar júıeli túrde atqaryla beretininen senim bildirdi.

Qala ákimi osy sanattaǵy mańyzdy máseleler boıynsha qoldaý bildirgen máslıhat depýtattaryna óz alǵysyn aıta otyryp, depýtattyq korpýs ókilderin kele jatqan Qazaqstan Respýblıkasynyń Konstıtýsıasy kúnimen quttyqtady.

Jıyn sońynda Murat Áıtenov Reseıdiń Ýfa qalasynda ótken erkin kúresten álem chempıonatynyń qola júldegeri Bekzat Ermekbaevty ortaǵa shaqyryp, arnaıy quttyqtady.